Kawnpui leh Khamrang inkar NH-06 siam mekin nitin mamawh phur Motor te chhuahtir tan an ni

National Highway-06 (NH-06) Kawnpui leh Khamrang inkar kawng chhia thawmthat hna chu thawh mek niin Inrinni tlai atang khan nitin mamawh bungrua (essential commodities) phur lirtheite chu kaltlang tir tan an ni leh tawh.

Kawnpui leh Khamrang inkar kawng chhia avanga harsatna thleng hi Inrinni khan Public Works Department (PWD) Minister Vanlalhlana leh Food, Civil Supplies & Consumer Affairs (FCS&CA) Minister B. Lalchhanzova te chuan a hmunah tlawhin kawng chhia thawmthat hna thawh mek te an enfiah a, helai hmuna kawng chhia siam hna hi chak zawka thawh a nih theih nan Ningani kalta, Sept. 19, 2024 atanga Inrinni, Sep. 21, 2024 thlengin kawng thawmthat hna PWD in Team 4-ah inthenin JCB 5, Excavator 1, Road Roller 4 leh hlawhfa tam zawk ruaiin a siam a. Zirtawpni zan atang khan Silchar lam pan tur lirthei te chhuah an ni a, Inrinni tlai atang khan Aizawl pan bungraw phur lirtheite chhuah an ni ve leh ta bawk a, harsatna thleng pawh ziaawm zui tura beisei a ni.

NH-06 Kawnpui-Khamrang Section huamchhung KM 122-123 inkarah kawng thawmthat ngai zual 2-3 vel awmin, KM 124-126 inkarah 5-6 leh KM 129-132 inkarah 4-5 vel awmin a zualpui zawhfel tawh a ni a; ngun taka vilzui zel a ni dawn a, lirthei tana zawh harsa laite pawh a tul anga thawmthat zel tum a ni.

Sawrkar thuchhuah tarlan danin NH-06 Kawnpui-Khamrang Section hi Sadguru Engineers & Allied Services Pvt. Ltd-te siam niin, nakum (2025) May thla thenga enkawl chhunzawm tura tih an nih laiin an enkawl zui that loh avangin PWD in an tihtawp sak a, an pawisa dahkham cheng nuai 35.37 hmangin PWD in cheithat hna an thawk mek a; hei hian a siamthatna a daih dawn loh avangin a thawh chhunzawmna tur Sawrkar ah dil belh mek a ni.

NH 06 hi Sawrkar laipui Ministry of Road Transport and Highways (MoRTH) kawng niin, Four Lane a siam turin NHIDCL kuta dah a ni a, DPR siama Tender chhuah niin Contractor pawh thlan fel a ni a, compensation chungchangah Forest ram leh mimal ram inthuah a awm avangin hna tan theih a la ni rih lo a ni. Sadguru Engineers & Allied Services Pvt.Ltd kawng siam NH 06 Kawnpui-Khamrang inkar hi defect liability period chhunga la awm a nih avangin PWD kut atangin NHIDCL chuan an la chhawng thei rih lo a, PWD in an enkawl hnuah theihtawp chhuaha cheithat mek zel a ni a, NHIDCL kuta hlan thuai tum niin hemi hnu hian a enkawl zui hna chu NHIDCL in an tum tawh dawn a. NH-06 Khamrang-Sairang Section bik hi NHIDCL kutah hlan fel tawh niin an hnuaia Company-in a enkawl mek a ni.