Buhfai pek tur ah Central leh State an indawr mek

Mizoram-a sahimna zawnga lo lut raltlante buhfai a tanpuina tur chungchangah sawrkar laipui leh Mizoram sawrkar an indawr mek.

Home Department hotute hnen atanga thudawn danin raltlante chhawmdawlna atana sawrkar laipui in cheng vbc. 5 hu buhfai a rawn pek tur chungchang ah Ministry of Home Affairs nen an indawr mek a. Union Home Secretary an inthlak hlim deuh chauh a nih avangin he ruahmanna hi a kal muang ta deuh a. Bawhzui mek zel a ni, an ti a. Buhfai cheng vbc. 5 hu hi Ministry of Consumer Affairs, Food and Public Distribution-in a rawn pek tur a nih laiin a man hi Ministry of Home Affairs in a tum ang a. Buhfai hi Myanmar, Bangladesh leh Manipur atanga rawn raltlante hnena a thlawna sem tur a ni. Hemi chungchang ah hian August ni 14, 2024 khan Ministry of Consumer Affairs, Food and Public Distribution-a Under Secretary chuan Mizoram Food, Civil Supplies and Consumer Affairs Secretary hnenah lehkha rawn thawnin a thlawna buhfai an rawn pek tur hi Metric Ton 1,379 leh quintal 34, cheng vbc. 5 hu a nih thu a rawn hriattir a ni.

Sawrkar laipui ruahmanna ang chuan buhfai an rawn pek tur hi ni 60 chhunga pek fel hman tur a ni a. Tunah hian ni 38 vel hun a kal tawh a. A phurh chhoh dan tur leh thil tul dang buaipui-in sawrkar laipui leh Mizoram sawrkara a mawhphurtute an indawr chho mek zel a ni. 

Tun dinhmunah Mizoram-ah raltlan mi 44,000 vel an awm mek a. Myanmar atanga lo lut mi 34,000 thelh awmin, Manipur atanga rawn lut mi sang riat dawn leh Bangladesh atanga lo lut mi sang hnih chuang hret an awm a ni.