International Week of the Deaf hman mek a ni

Tun thla ni 29 thlenga hman tur, ‘International Week of the Deaf’ chu hman mek niin Serchhip District-ah pawh he Hapta hman chhung hian zirna In hrang hrangah ri hriatna tha lo chungchanga hriat tur pawimawh inzirtirna atan leh ri hriatna enfiahna hun atan hman a ni ang.

Tun thla ni 23 atanga ‘International Week of the Deaf’ hman mek pual hian nimin khan DIET Serchhip-ah National Programme for Prevention and Control of Deafness (NPPCD) buatsaihin ri hriatna tha lo chungchanga hriat tur pawimawh inzirtirna hun hman a ni a, he Hapta hman chhung hian zirna In hrang hrangah hetiang hun hi buatsaih tum niin Vawiin hian Chawngbuangi Memorial School-ah hun hman leh tura ruahman a ni.

‘International Week of the Deaf’ ah hian thupui hrang hrang hman thin niin kumin hian ‘Sign up for Sign Languages Rights’ tih thu thupui atan hman a ni a, zirna In hrang hranga inzirtirna leh a thlawna inentirna buatsaih a nih bakah hian he Hapta hman chhung hian District Hospital Serchhip OPD-a Beng kaihhnawih inentir te tan a thlawnin ri hriatna that leh that loh entir theih a ni dawn bawk a ni.