EF&CC Department hmalakna thlirletna nei

Environment, Forest & Climate Change Department chuan nimin khan an Department hnathawhte thlirletna, Mid-term Review of EF&CC neiin he hun hi EF&CC Minister Lalthansanga chuan a hmanpui a ni.

Wildlife Warden's Conference Hall, Aizawl-a Review Meeting-ah hian Minister Lalthansanga chuan Mid-term Review neih chu tihdan tta tak leh Department dangte tan pawha entawntlak nia a hriat thu sawiin, intuaitharna hun atana hmang theuh turin Department mi leh sate chu a chah a. Hetiang hun hman hian ram hruaitute pawh ram tana policy tangkai zawk siam kawngah a puih ngei a beisei thu a sawi a. Department hmalakna apiangah mipuite a tam thei ang ber an tel vena tura ruahmanna siam thin turin a chah bawk. Sik leh sa inlumlet (climate change) chungchang pawh Minister hian sawiin, Department hotute chu sawrkar kut leh ke an nih angin thurawn pek kawngah te sawrkar hmalakna a kal dik theihna tura theihtawp chhuahpui zel turte in a sawm bawk a ni.

Hun hman hi Commissioner & Secretary, EF&CC H. Lalengmawia chuan kaihruaiin A.K. Biswal, PCCF Mizoramin kalkhawm chhan a sawifiah a. Hemi zawh hian Department hnuaia Scheme hrang hrang sawifiahna neih niin, Forest Division hrang hrangte atangin an hmalakna theuhte ngaihthlak nghal a ni.