NSS Foundation Day vawi 55-na hmangin NSS chawimawina chi hrang hrang semchhuah a ni

National Service Scheme (NSS) Foundation Day vawi 55-na chu nimin khan Sports & Youth Services Minister Lalnghinglova Hmar hovin Aizawl-a Vanapa Hall-ah hman a ni a, State Level NSS Award for Volunteer dawng tura thlan C. Malsawmtluanga (Serchhip) hnenah Award hlan niin ‘NSS Annual Report 2023-24’ chu tlangzarh nghal a ni bawk.

NSS Foundation Day-ah hian Sports Minister chuan NSS thupui, ‘Keimah ni lovin nangmah’ tih chu a Pathian thu hle tih sawiin, NSS Volunteer te thisen pe tam ber an ni chu a ropuiin midangte tan malsawmna ni zel turin a chah a. An hnathawhna Adopted Village-ah danglamna a thleng em tih chu chona-ah ngaiin anmahni inenlet a, tan an lak a pawimawh thu a sawi a. “Danglamna thlentu kan ni em tih kan inngaihtuah a, kan lo ni lo a nih chuan Statistics tipungtu satliah mai kan ni thei a ni,” tiin NSS Volunteers te chu an ngaihdan an thlak danglam ngam angem, an thil chin tha lo te an thlak danglam ngam angem tih te inzawt theuh turin a chah bawk.

He hunah hian State NSS Officer cum Deputy Secretary F. Sangvuana chuan Report pein tunah hian NSS volunteers 30,100 awm mekin Mizoram zirna Inpui College 29 leh Higher Secondary School 72-ah NSS Unit 301 din a nih tawh thu a sawi a. Kum 2023- 2024 chhungin thisen Unit 4900 pek niin thisen pek tam lamah pakhatna dinhmun an hauh mek a. NSS volunteers te'n an hnathawh, Public Water Point, Vantlang Inthiarna, luikawr leh Vantlang Shed te tifai leh siam hnatlang vawi 50 vel an neih thu a sawi bawk.

He hunah hian NSS chawimawina chi hrang hrang sem niin Appreciation Certificate chu Joseph Vanlalhruaia, NSS Programme Officer, Synod Higher Secondary School, Aizawl, National NSS Programme Officer Awardee hnenah leh Lifetime Achievement Awardee, Dr.A.J. Rajan, NSS Programme Officer, St. John's Higher Secondary School, Kolasib hnenah hlan an ni a. Voluntary Blood Donation 2023-24 College Category-ah pakhatna Pachhunga University College niin thisen Unit 732 an pe a, pahnihna Govt. Hrangbana College (unit 451) leh pathumna Govt. Aizawl College (unit 424) an ni. HSS Category-ah lawmman pakhatna chu Synod Higher Secondary School niin thisen Unit 276 an pe a, Helen Lowry Higher Secondary School chu pahnihna niin Unit 93 an pe a, pathumna Govt. Zemabawk Higher Secondary School niin Unit 83 an pe bawk. Heng bakah hian State NSS Award 2023-24 chu Dr. Zothanpuia, Programme Officer, Pachhunga University College hnenah leh C. Malsawmtluanga, Volunteer, Govt. Serchhip College hnenah hlan a ni bawk.