CPA, India Region, Zone-III Conference zofel ta

Commonwealth Parliamentary Association (CPA), India Region, Zone-III Annual Conference vawi 21-na chu Inrinni khan chhunzawm leha zawhfel a ni.

Inrinni-a he Conference chhunzawm hi CPA, India Region, Zone-III Chairman leh Nagaland Legislative Assembly Speaker Sharingain Longkumar chuan kaihruaiin Project hrang hranga ruahmanna leh thawhhona tha zawk a awm theih nan DoNER Ministry leh NEC chhunfin chungchang sawihoin DONER Ministry leh NEC kaltlanga Scheme leh policy-te tha taka kalpui a niha, inhne remlo a awm loh nan a hranpain Ministry tan chauh Parliament-ah Departmental Related Standing Committee (DRSC) hran siam tura rawtna thlen nise tih a ni a, Northeast Region atanga MP intelkhawmte India sawrkar bakah Lok Sabha Speaker leh Rajya Sabha Chairman te hemi chungchang hi a hma thei ang bera sawipui tura biak nise tih a ni.

India-ASEAN Vision for Trade and Cooperation hnuaia Northeast Region tel ve dan tur chungchang ngun taka a ngaihtuah hnuah telh ve nise an ti a. Prime Minister kaihhruai Sawrkar laipuiin Northeast Region hmasawn nana 'Act East Policy' a kalpui chu tha tiin, hemi tichaka hmalakna zau zawk nein a nih theih nan Northeast Region chu India-ASEAN Bilateral Trade Agreement-ah telh a, International Border a neihte chhawr tangkaia India ram thanna tha tichaktu a nih theih nan hmalak nise an ti. Heng bakah hian India-Myanmar-Thailand Highway leh Kaladan Multi Modal Transit Transport Project te zawhfel thuai tura hmalakte, International Trading Outpost neih mek Moreh (Manipur), Zokhawthar (Mizoram) Pangsha leh Avangkhu (Nagaland) leh Pangsu Pass (Arunachal Pradesh) leh a dangte pawh thuamchak ni se tih a ni a. Northeast Region chu khualzin hip kawnga theihna nasa tak nei, hnam ziarang leh nunphung hrang hrang awmna a nih avangin hemi chawilar leh hmasawnna ruhrel siam kawngah theihtawp chhuaha hmalak nise an ti a, hmun tin tuama eizawnna siam tura tanlak nise an tih bakah Northeast Region leh ASEAN ramte inkarah insumdawnna leh thawhhona tha zawk siam a nih theih nan Cultural Exchange Program pawh siam tura hmalak nise an ti bawk.

21st Commonwealth Parliamentary Association India Region Zone -III kharna inkhawm hi chawhnu lamah neih zui a ni a, Chief Minister Pu Lalduhoma pawh a tel a. He hunah hian Chief Minister Lalduhoma chuan, DoNER leh NEC chhunfin an nih chuan chak lehzualin hmarchhak bialte mamawh a phuhruk theih zawk a rinawm tih sawiin, Bana Kaih Scheme hmanga Viksit Bharat 2047 tihhlawhtling tura hmalak an tum dan te a tarlang bawk.