Sawrkar laipuiin kuhva chin a khap loh thu an hrilh tih Rajya Sabha MP in a sawi

Mizoram Rajya Sabha MP K Vanlalvena chuan Union Agriculture Minister Shivraj Kumar Chouhan chuan sawrkar laipuiin kuhva chin a khap loh thu a hrilh tih a sawi a, PM-KISAN Scheme hmangin Mizoram-a buh chingtute chu puih theih an nih thu a sawi bawk.

Nimin-a Aizawl Press Club-a thuthar thehdarhtute a kawmna ah Rajya Sabha MP K. Vanlalvena chuan Mizoram Chief Minister Lalduhoma'n tunhnaia Assembly Session-a a thusawi ah Sawrkar laipuiin kuhva chin a khap tawh ni awma a sawi avangin Mizorama kuhva chingtute leh chin tuma hma la mektute manganna tawh thu September 13, 2024 khan Union Minister chu a sawipui thu leh chutianga khapna thupek chu Central sawrkarin a lo siam anih chuan an thupek sut leh turin a ngen nghal tih a sawi a. Union Minister of Agriculture Shivraj Kumar Chouhan chuan chutianga kuhva chin khapna thuchhuah chu Central sawrkarin a chhuah loh thu leh chutiang thuthang chu thu dik lo a nih thu a hrilh thu a sawi niin a sawi a. Hei mai bakah hian Rajya Sabha MP chuan Commissioner of Horticulture Prabhat Kumar pawh September 20, 2024 khan hemi chungchang hi a sawipui thu sawiin, ani pawhin Kuhva chin khapna thupek Central sawrkarin engmah thuchhuah a neih loh thu a sawi thu tarlang bawkin, Mizorama kuhva chingtute leh chin zel tumtute tan manganna tur a awm lo tih a sawi bawk.

MP K. Vanlalvena chuan Union Agriculture Minister nena an inkawm tum hian Mizoram mipuite chaw rinpui ber chu buh a nih thu leh kan khamkhawp buh kan thar loh avanga Central sawrkar puihna kan mamawh thu a thlen thu pawh sawiin, Mizorama buh chingtute tanpuina atan Minimum Support Price emaw, tangkafai-a tanpuina pek kan mamawh thu a thlen nghal bawk tih a sawi a. Union Agriculture Minister chuan PM-KISAN Scheme hmanga Mizoram loneitu buh chingtute chu an puih theih tur thu a sawi thu sawiin, “Hei hi Mizoram sawrkar tan hmalakna phurawm tak leh loneitute tanpuina tur tha tak a nih dawn avangin hmalak thuai ni se a tha hle ang,” a ti bawk.

Mizoram Rajya Sabha MP chuan nikum October 6 khan kum 2023-2024 atana Mizoram puma MP-LAD Fund thawk tura a thlanchhuahte list chu Aizawl DC-ah a thehluh tawh thu sawiin, MLA General Election leh Lok Sabha MP thlan avanga Model Code of Conduct chhuanlam avangte bakah Central sawrkar in MP Fund sem dan a rawn siam thar tak avangte in MP Fund thawk tura kathlan te hnenah hian District hrang hranga DC Office te leh an Area huamchhunga BDO Office engemaw zat te chuan Work Order chu hun rei tak chhung an pechhuak thei lo tih a sawi bawk a ni.