NFSA dawng tur thlan chungchang ah ngaihtuahna sen mek a ni - FCS&CA Minister

Food, Civil Supplies & Consumer Affairs (FCS&CA) Minister B. Lalchhanzova chuan National Food Security Act (NFSA) hnuaia hamthatna dawng tur thlan chungchangah ngaihtuahna thar sen mek a ni tih a sawi.

Tun dinhmunah kum 2011 chhiarpui angin NFSA hnuaia hamthatna dawng thei tur hi chhut a nih thu leh Mizoram quota hi tipung turin sawrkar laipui pawh a nawr tih Minister chuan sawiin, NFSA dawng tur hian Urban-I (District Capital)-a khawsa, kum khata nuai 5 la lut tling lo te, Urban-II (Sub Town)-a khawsa kum khata nuai 3.5 la lut tling lo leh thingtlang (Rural)-a khawsa kum khata nuai 2.5 lalut tling lo te chu NFSA hamthatna dawng thei tur hian ngaihtuahna sen mek a ni tih a sawi a ni.

Thudawn danin Mizoram-ah hian Ration Card nei chhungkaw 2,87,932 awmin Ration Card-a mihring awm zat chu 11,69,048 an ni a. Card Eng (AAY) 25,861, Card Pawl (PHH) 1,50,532 leh Card Var 1,11,539 awmin AAY-ah mihring 64,123, PHH-ah 6,40,992 leh Non NFSA (Card Var)-ah mihring 4,69,765 an awm a. Ration lakna atan ni lo, document pawimawha hman tur, Not Entitled for Ration (NER) Card nei mi 14 awmin mihring 31 an awm mek bawk. AAY-te hian thla khatah a thlawnin buhfai kg. 35 an dawng thei a, PHH-ah mi pakhatin a thlawnin kg. 5 an dawn theih bakah mi pakhat tan zel kg. 3 zel chu Rs. 15-in an khul thei bawk a. October, 2024 atangin Card Var neiten buhfai kg-ah Rs. 30-in an khul a ngai tawh dawn a ni.

FCS&CA Minister chuan October, 2024 atanga Retailer-ten buhfai an hralhna atanga an hlep chu duli (.50) atangin Rs. 1.50-ah tihsan a ni dawn tih sawi bawkin, “Retailer-te lawmman tihsan vang hian kum khata sum sen belh tur hi vbc. 17 vel ni turah kan chhut a, a hma khan vbc. 6 vel kan seng a. Mahse, buhfai carry over atangin kum khatah vbc. 25 vel hum kan beisei a ni,” a ti a. March atanga August, 2024 chhung khan carry over atang hian buhfai quintal 15,000 vel an hum niin a sawi bawk.

Mizoram-ah hian NFSA hnuaia hamthatna hi March 1, 2016 atangin hman tan a ni a, Rampum-a hmalakna kal mek, Adhaar leh Ration Card thlunzawm chungchangah Mizoram chu India rama a titha ber niin 100% thlunzawm a ni tawh bawk a ni.