Health Minister Lalrinpuii’n Nurse hna chu hna zahawm leh tha a nih thu a sawi

Health Minister Lalrinpuii chuan Nurse hna chu hna zahawm leh hna tha tak a nih thu sawiin, Sawrkar pawn a ngaipawimawh thu a sawi.

Mizoram College of Nursing (MCON) in nimin-a 37th Graduation and Lamp Lighting Ceremony 2024 an buatsaih a hmanpuina ah Health Minister chuan tunlaiah Social Media a chak tawh tih sawiin, Nurse vin, Nurse sual chungchang hmuh tur a awm leh thin chu a pawi a tih thu a sawi a, an tawngkam khat lek pawhin dam lo te a tidam sawng sawng thei a, midangte tanpui thei tura zirchhuak an nih inhrereng turin a chah a. Tunlai mila inherrem thiam tur leh hmasawn tumna rilru nei a, ruihhlo leh HIV/AIDS chungchangah midangte zirtirtu, midangte entawntlak ni turin a chah a. Nurse hna chu hna zahawm leh hna tha tak a nih thu sawiin, Sawrkar pawn a ngaipawimawh thu a sawi a, “Hmani lawka India rama Nurse hnathawk tha chawimawina - Florence Nightingale Award kan Mizo Nurse Pi H. Mankimi'n India President hnen atanga a dawng thei kha thil hlu leh ropui tak a ni,” a ti bawk.

Health Minister chuan Mizoram Health System Strengthening Project hnuaiah World Bank Funding-in MCON thuamthat hna thawh mek a nih thu pawh he hunah hian sawiin, Building sakna atan cheng vbc. 5.73 leh hmanrua leh furniture tul lei nan vcb. 3 sanction niin hna hi August 2023 atanga thawh tan tawh a nih thu a sawi a. M.Sc Nursing (25 seats/year) leh Post Basic B.Sc Nursing (30 seats/year) zirna July 2025 atanga tan tura hmalakna neih mek a nih thu sawiin, Ministry hnuaiah Mizoram chhunga Nurse te tan training paruk pekna tur dilna siam niin phalna pek tawh a nih thu leh cheng nuai 13.71 vel tura ruahman a nih thu a sawi a. Nurse zir chhuakte chu an kalzelna turah duhsakna hlanin zirlai lut tharte pawh hlawhtling ngei tura theihtawp chhuah turin a chah bawk a ni.

He hunah hian MCON Principal Lalduhsaki Report atanga a lan danin MCON hi GNM (General Nursing and Midwifery)-in kum 1980 khan din a ni a, kum 2005-ah B.Sc Nursing zir tan theiha buatsaih niin tunah hian Nurse zirlai 131 an awm mek a, an vai hian Hosteller vek an ni a. Teaching Faculty 22 awm mekin Non-Teaching Staff 30 vel an awm bawk a. Graduate thar te hi Batch 16-na niin an vaiin 30, hmeichhia 28 leh mipa 2 an ni.

Nimin-a B.Sc Nursing zirchhuakte zingah hian TATA Medical Center Kolkata, Appolo Hospital Delhi, Max Hospital Delhi leh Yashoda Group of Hospital Hyderabad-ah te placement Job hmu sa 17 an awm a. Nimin-a he hun hmanna ah hian Lalchhanhimi, Jt. Director (Nursing), Directorate of Nursing kaihhruaiin Nursing zir thar tur 19th leh 20th Batch atangin thutiam neiin Lamp Lighting neihna hun an hmang bawk a. Adviser to CM (Finance & Planning) TBC. Lalvenchhunga MLA chuan he hun hi Khual zahawm niin a hmanpui bawk a ni.