Tuirial-a Sports & Youth Services ram tur enfiah

Sports Minister Lalnghinglova Hmar chuan Tuirial-a Sports & Youth Services Department ram atana ruahman BSF awmna leh Tuirial Airfield hluite chu niminpiah tlai khan a hmunah kalin a enfiah.

Sports Minister hi BSF Commandant Rakesh Panwar chuan lo dawngsawngin an ram luah lai hi zangnadawmna cheng nuai 3.5-in Sports Department-in tangkai zawka an hman atan an kutah hlan an tum a. He hmunah hian nakin huna rampum huap Sports Event a thlen pawha dawlzo thei turin Project siam dan turah hmalak tum a ni.

Tuirial Airfield leh a bul vela Tourism Department hmalakna-a Eco-adventure Circuit Swadesh Darshan hnuaia building sak te chu tangkai zawka hman dan tur dap ni se tiin Airfield Runaway Protected area bulhnaia mimal ram 35 zet leh In sa te chu dan anga chhuahtir a, Sawrkar in laklet dan ngaihtuah nise tih a ni bawk. Minister in a tlawh Sports & Youth Services ram tur atana thlitlaiah hian BSF 38th Battalion an awm mek a, BSF awmna bik ram zau zawng hi acre 3.19 (11.23 bighas) a ni.