Myanmar atanga raltlan rawn lut an pung leh hlek

Myanmar ramchhung buaina avanga sahimna zawnga Mizoram-a raltlan awm mek chu kar kalta ah khan mi 205-in an pun belh niin sawrkar chuan a chhinchhiah.

Sawrkarin a chhinchhiah dan chuan Mizoram-a Myanmar raltlan lo luh thar belh mi 205 hi Khawzawl District-a lo lut an ni a. Heti hian tun dinhmuna Mizorama sahimna zawnga Myanmar raltlan awm zat zawng zawng chu mi 33,961 an tling ta a. District 11-ah awm darhin District 4-ah chuan an pual bika siam Relief Camp-ah awm lovin chhungte leh thiante an belh bakah mi In luahin an khawsa a ni. Myan-mar atanga raltlan, tuna Mizoram a awm mekte zinga 10,228 hi mipa an ni a, midang 10,856 hi hmeichhia niin mi 12,877 te chu naupang an ni. 

Myanmar raltlan zinga mi 16,969 te chu an puala siam Relief Camp 129-ah an awm mek a, anni aia tam hret mi 16,992 te erawh chuan an chhungkhat laina leh thiante an belh bakah mi In luaha khawsa-in thenkhat erawh chu an chhungkua a mi huan enkawla ram lama Thlam-a khawsa mekte pawh an awm a ni.

Myanmar atanga Mizorama rawn raltlan te hi February ni 1, 2021 a Myanmar sipai hotu lawkte'n sawrkarna chelh mektute lak atanga thuneihna an chhuh luih a an hnehlak hnu March thla bul lam khan an rawn lut tan a. Raltlan hi pung chho zelin an tam lai ber phei chuan sing li an chuang daih a ni. A then an ram lama let leh emaw, hmun danga kal emaw an awm chungin kum 3 leh thla 6 liam hnu-ah pawh an ram boruak avanga haw ngam rih lo engemaw zat hi an la awm mek bawk a ni.