Health Minister in World Pharmacists Day hmanpui

Nimin September 25, 2024 khan khawvel pumah Pharmacist-te ni, ‘World Pharmacists Day’ hman a ni a, he ni puala Aizawl-a hun hman chu Health Minister Lalrinpuii chuan a hmanpui a ni.

Mizoram State Pharmacy Council ruahmanna a Bawngkawn South YMA Hall-a World Pharmacists Day 2024 puala hun hman ah hian Health Minister Lalrinpuii chuan Pharmacist-te pawi-mawhna leh mawhphurnate sawiin, Pharmacy chu eizawnna leh mahni kea dinga sumdawnna tha tak a nih thu bakah damdawi siamchhuah kawngah te, damlote tana damdawi nghawng hrang hrangte pawh thiamna bik nei leh zirchianga hrechiang bertu an nih avangin khawtlang tana tangkai zawka hma la zel turin a fuih a. District Hospital tinah tal damdawi lama thiamna bik nei Pharmacist-te an awm a pawimawh thu a sawi. Hei bakah hian Health Minister chuan Mizoram-a ruihhlo leh HIV hluar zel chungchang ah pawh Pharmacist-te chu thiamna bik nei an nih avangin tangkai lehzuala khawtlang, sawrkar leh midangte tana an thiamna bik hmang zel turin a chah bawk a ni.

Mizoram State Pharmacy Council-a Vice President Dr. H. Lalhlenmawia kaihhruai he hunah hian an President Lalsawma chuan Pharmacist-te leh zirlaite chu midangte tana tangkai zawk leh dan ang taka damdawi mipuiin an hmuh theihna tura hmalakna kawngah theihtawp chhuah turin a chah a. Dr. Lalnunpuii chuan kumin khawvel pum Pharmacist-te ni thupui, 'Pharmacists: Meeting Global Health Needs' (Khawvel mipuite hriselna atana Pharmacist-te pawimawhna) chungchang a sawi bawk.

World Pharmacists Day hi kum 1992 atang khan International Federation of Pharmacists huaihawtin kumtin hman thin a ni a, nimin a hun hman ah hian Pharmacy zirlaite leh zirchhuak a hna thawk mek te an tel a ni.