Kum 2023-2024 ah Ui seh case 1077 awm

Kum 2023-24 chhung khan Mizoram-ah Ui seh (dog bite) case 1,077 a awm a, thi erawh an awm lo.

Health Department chhinchhiah danin kum 2023-24 chhunga Ui seh case tamna ber chu Lunglei District niin 407 zet a awm a, Aizawl leh Siaha District-ah case 296 ve ve awmin Case tam ber dawttu an ni a. Saitual leh Champhai District-ah case pasarih ve ve awmin a tlemna ber an ni thung. Kum 2023-24 chhungin Mizoram-ah Ui seh case 1,077 a awm lai hian vanneihthlak takin thih phah erawh an awm lo a. Kum liam ta, 2023-24 chhung vek khan ramsa dang seh case Mizoram-ah 328 awm bawkin he case-ah pawh hian thi an awm lo a ni.

Hetihlai hian Veng/Khua/District chhungah Ui khuahkhirh loh a tama hriat a nih avangin leh Ui khuahkhirh lohin mipui nunphung tikhaihlaka harsatna nasa tak a siam bakah, Ui seh an awm fo thin avangte, Veng leh khua a thianghlima mipuite an him zawk nan leh an lo hrisel zawk nan Ui khuahkhirhna thupek kengkawh an awm nual a, District chhunga thupek chhuahte mai bakah mahni veng leh khuaah te dan siam a, Ui khuahkhirhna siam an awm nual bawk.

Lunglei District huamchhungah chuan Ui kawlh chi, mihring tana hlauhawm chi hrang hrang vulh khapna thupek chu kumin July thla khan chhuah a lo ni tawh bawk a, heng Ui hlauhawm chi vulh mekte chu an Ui vulhin chi an thlah theih loh nan, Veterinary Hospital-ah emaw, Private Clinic-ah emaw an Uite a Chhul/Til laktir ngei ngei tura hriattir an lo ni tawh bawk.