Bawng talh lo tura beitute Lengpui atangin kir leh

Hindu pawl pakhat Shankaracharya of Jyotirmath Peeth in Mizoram-a Bawng talh lo tura beihpui thlak an tumna chu Mizo Zirlai Pawl (MZP) atanga dodalna a nasat avangin Zirtawpni kaltaa Lengpui Airport-a Private thlawhna hmanga an lo tum hnuah an thlawklet leh nghal.

Hemi chung-changa MZP thuchhuah tarlan danin Hindu pawl pakhat Shankaracharya of Jyotirmath Peeth ten North East State hrang hrang leh Mizoram-ah Bawng talh lo tura beihpui thlak an rawn tum chu duh lovin September 13, 2024 khan thuchhuah an lo siam tawh a. Zirtawpni khan heng pawl te hi Mizoram-a rawn kal tumin, Private thlawhna hmangin Lengpui Airport-ah an lo tum a. Zirlai pawl ten an duhloh zia thuchhuah an lo siam avang leh an dodal dawn tih an hriat avangin an thlawk let leh niin an tarlang a ni.

Hnamdang pawl thenkhatin Mizoram chhungah Bawng talh lo tura mipui hrilhhriatna beihpui thlak an tum chu MZP chuan engti kawng mahin a pawm ngai dawn lo tih pawh an thuchhuah ah hian tarlangin, Hetianga hnam dang pawl then-khatin, Hnam nunphung khawih thei thil inzirtirna rawn neih an tum hi nakin zel atan a him an ring lo tih an sawi a. An chetvel dan chu MZP in uluk takin a chhui zui zel dawn thu leh Mizo mipuite pawh hetiang hmalakna lakah fimkhur a, lo beng-khawn lo tura an ngen thu an sawi a. Shankaracharya Pawl te hmalakna hi MZP in NESO a a thawhpui pawl, North East-a zirlai pawl hrang hrang; Khasi Students' Union leh All Arunachal Pradesh Students' Union te pawhin an dodâl tih an sawi a ni.