Kumin-a Mobile Veterinary Unit (MVU) Staff te hlawh tur za zela 25 (25%) sanction a ni

Sawrkar laipui chuan kumin 2024-25 chhunga Mobile Veterinary Unit (MVU) Staff te hlawh tur za zela 25 (25%) chu a sanction.

Hemi chungchanga sawrkar thuchhuah tarlan danin New Delhi-a cham mek AH&Vety Minister C. Lalsawivunga chuan niminpiah khan Union Minister for Fisheries, Animal Husbandry & Dairying Rajiv Ranjan Singh chu hmuin nikum 2023-24 chhunga MVU Staff te hlawh tur central sawrkar in 25% chauh a pek avang leh MVU Staff ten October, 2023 thleng chauh hlawh an lak avanga an nawrhna te, African Swine Fever (ASF) avanga State tawrhna leh ASF Compensation chungchang bakah Mizoram chu ruahtui tlak tamna a nih avanga Govt. of India Vaccination Schedule anga a kal ve theih loh dan te a thlen a. Union Minister Rajiv Ranjan Singh chuan MVU hlawh chungchang chu revised proposal siama thehlut tura tiin, an lo approve tur thu a sawi a, kumin 2024-25 chhunga MVU Staff te hlawh tur 25% sanction nghal a ni bawk. North East tana Vaccination Schedule hran siam dan tur ngaihtuah anih thu leh ASF Compensation chungchang pawh Govt of India in a ngaihtuah zel tur thu a sawi a. Check Post tam zawk siamna turin NADCP scheme hmang tangkai turin a chah bawk a ni.

Ministry of Panchayati Raj changtu ni bawk Ranjan Singh nen hian Local Administration Department mamawh te an sawidun a, LAD Minister hian VC-te enkawlna atana Central Scheme - Rastrya Gram Swaraj Abhiyan (RGSA) chungchang thlenin, kum 2024-25 atana Central in budget a pawmsak cheng vbc. 103.11 atanga 50% chu RGSA Guidelines anga release sak thuai turin a ngen a. Hei hi Union Minister chuan lo release sak thuai a tum thu a sawi a. He Scheme hnuaiah hian VC House sakna turte, thingtlang khuaa Common Service Centre (CSC) dinna turte, VC te khawtlang rorelna kawnga an thiamna leh hriatna tipung tura training pekna tur Fund te, District Panchayat Resource Centre sakna turte leh thildang pawimawh tak tak a tel a. Heng bakah hian VC ten khawtlang hmasawnna hna an kalpuina tur Rural Local Body Grant chungchang te an sawidun bawk a ni.

Minister C.Lalsawivunga hian Union Minister for Minority Affairs Kiren Rijiju leh Minority Affairs Secretary Dr. Chandra Shekhar Kumar hmuin, Mizoram atanga PMJVK hnuaia Project thehluh te a sawipui a, Union Minister hian Mizoram atanga Project thehluh te a ngaih pawimawh thu leh theihtawpa hma a lo lakpui zel tur thu a hrilh a. Union Minister of State for Fisheries, Animal Husbandry & Dairying George Kurien pawh hmuin Mizoram mamawh te a thlen nghal bawk a ni.