VC By-election ah Independent leh ZPM thlantlin an ni

Serchhip District chhung Village Council pahnih ah nimin khan by-election chu tluang taka neih a ni a, Serchhip Chhim Veng VC-ah Independent Candidate PC. Siamliana thlantlin niin New Serchhip North VC-ah ZPM Candidate H. Lalengzauva te thlantlin an ni.

Serchhip Chhim Veng Village Council-a General Seat ruak pakhat hnawhkhat tura by-election neih ah hian nimin zing dar 7:00 atang khan tluang taka Vote thlak a ni a, chawhma lamah Vote thlak an thain chawhnu lamah erawh Vote thlak hi an tam lutuk lo a, Vote nei mipa 432 leh hmeichhia 443, an vaiin mi 875 atangin mipa 286 leh hmeichhia 307, an vaiin mi 593 ten Vote hi an thlak a, Vote za zela 67.77 in Vote hi an thlak a. Nimin tlai dar 5:30 khan Vote tla te hi chhiar nghal niin Independent Candidate PC. Siamliana chuan Vote 237 hmuin thlantlin a ni a, amah hnaih bertu ZPM Candidate Chawnghranghluna chuan Vote 229 a hmu a, MNF Candidate Lalbiakdiki chuan Vote 118 a hmu bawk a ni.

New Serchhip North VC-a General Seat ruak pakhat hnawhkhat tura by-election ah pawh hian nimin zing dar 7:00 atang khan tluang taka Vote thlak a ni a, he VC-ah hian Vote nei an tam deuh avangin Polling Booth pahnih siam a ni a, Vote nei thei mipa 771 leh hmeichhia 826, an vaiin 1597 atang hian mipa 449 leh hmeichhia 497, an vaiin mi 946 ten Vote hi an thlak a, Vote za zela 59.23 ten vote an thlak a ni. Nizan dar 6:30 khan he Inthlanna a Vote tla te hi chhiar nghal a ni a, ZPM Candidate H. Lalengzauva chuan Vote 462 hmuin thlantlin a ni a, MNF Candidate B. Lalpanliana chuan Vote 363 hmuin INC Candidate H. Vanlalsawma chuan Vote 116 a hmu bawk.

Nimin a by-election neihna VC pahnih te hi nimin tlai khan Serchhip District Election Officer leh District Bawrhsap Paul L. Khuma chuan a hmunah a tlawh a, Inthlanna buaipui dan te enpuiin Election Officer F. Lalnisai leh DIPRO Lalnunmawii ten an tawiawm a ni.