E-waste Management chungchângah Workshop nei

Nimin Sept. 23, 2024 khan E-waste Management chungchâng Awareness Workshop chu Aizawl-a Taxation Department Auditorium-ah neih a ni.

Mizoram Pollution Control Board (MPCB) leh Hulladek Recycling Company-te buatsaihin E-waste Management chungchânga Workshop hi MPCB Chairman Liankima Lailung (IFS Rtd.) chuan khuallian nia hmanpuiin Electronic bungraw chhia (e-waste)-te hi phalna nei (E-waste Collector) te hnenah chauh kan thehthang tur a ni tih sawiin, phalna pe theitu chu State Pollution Control Board-te an nih thu a sawi a. Collector-te hian Store/Stock chiah an ti thei bawk tih sawiin, an thiat darhin an phelh darh thiang lo tih a sawi bawk. E-waste aia hlauhawm bawlhhlawh dang hi a awm lo tih theih a nih thu pawh MPCB Chairman chuan sawiin, chuvangin a hranin Dân pawh siam a nih thu leh Khua leh tui tha chuan kan tih âwm tak dân chu thu awih takin kan zâwm mai tur a ni tih a sawi bawk.

He Workshop-in a tum ber chu dân zâwmin engtin nge kan electronic bungraw chhiate kan thehthang ang tih a ni ber a, bawlhhlawh dang zîngah kan paih ve mai thiang lo a, a chhan chu chhiatna nasa zâwk thlen thei thilte a awm avâng leh kan environment vawn thianghlim zêl nân te, company lama thawnlêt-a recycle theih thilte a nih thin avângin E-waste khawnkhâwm tura SPCB-in phalna a pêkte kutah chauh hian kan pe thin tur a ni a. Hulladek Recycling Company-te hi kan electronic bungraw chhiate khawnkhâwma dân dik taka a tûl anga thehthangtute an ni a, anni hnênah hian eng lai pawhin kan E-waste-te kan pe-in kan tiral thei reng a ni. He Workshop-a kal khâwmte hian E-waste titlêm tur leh dân dik taka thehthang zêl tawh turin thu an tiam (pledge taking) nghal vek a ni.