Ruihhlo do chungchanga hma la turin Serchhip-ah Working Committee din a ni
Tunhnaia Social Media hrang hranga he Video darh chungchangah hian Zirtawpni tlai khan Serchhip District Task Force on Ruihhlo Do chuan an Chairman leh Bawrhsap Paul L.Khuma kaihhruaiin thutkhawm pawimawh an nei a, he thutkhawm ah hian Bawrhsap chuan Serchhip khawpui ah thalai engemawzat ruihhlo bawih-ah an tang a, ruihhlo zuar ru engemawzat an awm nia a lan avangin tan lak nasat zual a ngai hle, a ti a. Reilote atan chauha ruihhlo tihrem chu a tawk lo a, engtinnge a rem hlen theih ang tih ngaihtuah a pawimawh tih a sawi a. “Chutihrualin, ni khat thil thua rel fel chi a nih loh avangin tun dinhmunah engnge kan tih theih hmasak tih ngaihtuah a tul a ni,” a ti a. Excise leh Police te hnathawh that avangin ruihhlo zuar engemawzat man an ni a, hei vang hian tunhnai ah ruihhlo a vang nia a lan thu DC chuan sawiin, tha thlah lova tan la zel turin a fuih bawk.
Bawrhsap chuan Nasha Mukt Bharat Abhiyan (NMBA) kaltlangin hma lak mek a nih dan sawiin, heng ruihlo bawih-a tang te hi tute nge an nih tih zawng chhuakin, an sim theih nana tanpui dan tur ngaihtuah an tum dawn tih a sawi a. Ruihhlo dona kawngah NMBA in ruahmanna mumal tak a siam thu te pawh a sawi bawk.
Meeting hian sawrkar a Force te bakah tlawmngai pawl te leh Kohhran ho tanhona a pawimawhzia an sawi a. Serchhip Addl. SP Saidingliana Sailo kaihhruaina hnuaiah Working Committee din nghal niin, Serchhip District Police leh Excise te mai bakah a remchan dan angin YMA Branch hrang hrang te leh VDP te nen thawkho a, hunbi neiin nasa lehzualin duty ni se tiin an rel a. Ruihhlo ngai te kal tamna hmun nia ngaih ah te leh ruihhlo zuar te awmna hmun nia ngaih hmun thenkhatah ngawrh lehzualin duty ni se, Supply Reduction-ah nasa lehzualin tanlak nise an ti bawk.
He thutkhawm ah hian Task Force bakah Kohhran hruaitute, Sub-Hqrs. YMA te, Chhim Veng leh Kawnpui South YMA hruaitute leh VC leh VDP te an tel a ni.
Comments
Post a Comment