Serchhip Auditorium ruhrel mipuite tana a la him leh him loh a hmunah enfiah a ni

Serchhip Auditorium Building ruhrel (Structure) chu mipuite tana a him leh him loh nimin khan enfiah a ni.
Serchhip Field Veng-a Serchhip Auditorium hi tunhnaiah a kawt bakah a Building-a bang thenkhat te nasa taka a khik avangin Serchhip DC Office hmalakna in nimin khan PWD-a Quality Control Division chuan a hmunah kalin an rawn enfiah a, he hunah hian Sr. SDO Diana Lalramthari hovin H. Vanroliana, T/SA leh Lalrempuia, Lab. Attendant te rawn kalin Serchhip DC Office atangin Addl. DC Lalrinzuala leh UD&PA Department-a thawktute chuan a lo dawnsawn bakah Serchhip a ZPM Block hruaitute leh tualchhunga chanchinbu mi thenkhat ten an lo tawiawm bawk a, Auditorium Building hi a chhawng hnuai ber atanga enfiah niin a ban leh beam te chu a la chak tha em tih khawl hmanga enfiah a ni a, heta an thil hmuhchhuah te chu Serchhip DC hnenah thehluh leh a ni anga, hemi atang hian hmalak zui dan tur chu la ngaihtuah a ni ang.

Serchhip Auditorium Building enfiah tura rawn kal Sr. SDO Diana Lalramthari chuan Auditorium Ban leh Beam-a RCC chhun te chu a la tha thawkhat viau nia a lan thu sawiin, amaherawh a bulthut lamah lei che awm thin a nih avangin hemi che hian a building hi a ti che nia rin theih a nih thu LENKAWL a hrilh a, hei vang hian a hnuai lei chhung chu chiang zawka helam thiam ten an enfiah a pawimawh thu sawiin, tun tuma an thil hmuh dan report chu chawlhkar khat chhunga an peih hman a beisei thu a sawi bawk.

Serchhip Field Veng-a Field No-I awmna hmuna Auditorium hi cheng nuai 2126.01 senga sak niin Ministry of Urban Development sum hmanga sak a ni a, Urban Development & Poverty Alleviation Department chu Nodal Department niin NBCC Ltd. chu Implementing Agency a ni a, June 23, 2017 khan khatih laia Chief Minister Lal Thanhawla chuan a hawng a ni. Serchhip Auditorium-ah hian mihring 1000 thut theihna tur thutthleng dah niin Ground Floor-ah hian VIP Lounge, Office Room, Refreshement Room, Exhibition Hall, Green Room leh inthiarna awmin 1st Floor-ah Meeting Hall pahnih, Rest Room leh inthiarna a awm a, 2nd Floor-ah Auditorium ber hi dah niin hetah hian Light leh Sound System tha tak dah nghal niin kangmei chhuak palh ah pawh kangthelhna hmanrua dah nghal a ni a, 3rd Floor-ah Light leh Sound Control-na awmin Projector tha tak dah a ni a, DG Set 250 kVA leh Transformer 125 kVA te dah a ni bawk a. Heng bungraw dah zinga a tam zawk chu hman hleih theih lohin a chhe tawh a, a bik takin Light leh Sound te a chhe nasa in a bang leh kawt vel hi nasa takin a khi a, Ceiling te pawh nasa takin a chhia a, inthiarna te pawh hman tlak a awm mang lo a ni.