Best Tourism Village Competition-ah Sialsuk in lawmman la

Sialsuk khua chuan World Tourism Day 2024 denchhena a buatsaih ‘Best Tourism Village Competition 2024’ ah ‘Community Based Tourism’ ah lawmman dawngin nimin khan he chawimawina hi hlan an ni.

Sawrkar laipui-a Ministry of Tourism chuan World Tourism Day denchhenin ‘Best Tourism Village Competition 2024’ hi an buatsaih a, he inelna ah hian Sialsuk khua han Category 5 zinga pakhat ‘Community Based Tourism’ ah Best Tourism Village lawmman an la a, lawmman hi nimin-a World Tourism Day lawmna New Delhi a neihah India Vice President Jagdeep Dhankhar leh Union Minister of Tourism and Culture Gajendra Singh Shekhawat te chuan an hlan a, Bialtu MLA Baryl Vanneihsangi Tlau leh Tourism changtu Secretary Dr. Lalrozama ten Sialsuk khaw aiawhin an dawng a ni. He intihsiakna ah hian State 30 atangin khaw 991 an inlan a, chung khaw 991 te chu Category hrang hrang pariat (8) ah thliar leh niin chuta tang chuan khaw 36 te chu lawmman la tura thlan chhuah leh an ni.

Sialsuk khua ah hian mi cheng 2370 awmin, chhungkaw 27 in tourism kaihhnawihin ei an zawng a. Tourism atanga sum lut zaa sawm hi an khaw Health Care tihchangtlun nan an hmang thin a ni. Sialsuk-ah hian Homestay 10 awmin khum 30 a awm a, kum khat chhungin mi 15,000 atanga 20,000 velin an khua hi an tlawh thin anga chhut a ni. Siaksuk Village Council kaihhruaina in Sialsuk Tlang Committee (Sialsuk Ecotourism Development Committee) dinin Tourism tih hma-sawnna tur kawng hrang hrang an dap thin a ni.

Best Tourism Village Competition hi kum 2023 atang khan Ministry of Tourism hian World Tourism Day denchhenin a buatsaih tan a, a hmasa ber atan Reiek khua in Best Tourism Village an lo la tawh bawk a ni.