Solar Rooftop Scheme kalpui zel dan tur sawiho

Nimin khan Power Minister F. Rodingliana hovin a Pisa-ah Solar Rooftop Scheme, PM Surya Ghar Muft Bijli Yojana chu chak zawka kalpui dan tur sawiho a ni a, he sawihona hunah hian P&E Department Official-te leh Empanelled Vendor te an tel a ni.

He thutkhawm ah hian P&E Minister F. Rodingliana chuan Mizoram sawrkar in Rooftop Solar kW 1 zelah Subsidy Rs. 12,000 a pek thu sawiin, 10 kW thleng installation ti duh tan he Subsidy hi pek a ni dawn tih a sawi a. He Scheme hnuaiah hian Central Sawrkar chuan kW 3 thleng subsidy pek sak theiin, kW 1 zelah Rs. 33,000 Subsidy a pe a. Hemi belhchhah nan hian State sawrkar chuan subsidy hi a tum ve leh tih a sawi a. He Scheme hmang tangkai duh, a tira senso tur sumlu neilo tan Interest hniam takin Bank Loan a lak theih dawn tih a sawi bawk.

He Solar Rooftop Scheme hi India Prime Minister Narendra Modi an February ni 29, 2024-a a tlangzarh niin, Solar Rooftop hmanga power tam zawk tharchhuahna tur leh mimal In (residential building) ten an kawlphetha mamawh an tharchhuah theihna tura ruahman a ni a. Mizoram-ah chuan Power & Electricity Department (DISCOM) chu State Implementing Agency atan Central Ministry in a ruat a, Sawrkar in tehfung hrang hrang a siam paltlang, Empanelled vendor a thlante hmangin mimal diltute hnenah Solar Rooftop Installation hi tih sak tur a ni. Chenna In a vuah, Solar Rooftop atanga kawlphetha siamchhuahte hi in neitute hman bak chu sawrkar in Unit khat Rs. 4.80 zelin a lei let sak dawn a. Tun thlengin Mizoram bikah Empanelled Vendor 11 an awm tawh a ni.

Nimin-a thutkhawm ah hian zau zawk leh nasa zawka mipuite hnena he Scheme zirtirna thehdarh dan tur sawiho niin, Department mai bakah Vendor te chu Scheme chungchang uar zawka mipuite hnena tlangzarh turin a rel a ni.