Bawrhsap in Kawlri Tlang-a Heritage Site a tlawh
Serchhip Kawlri tlang-ah hian NEC atanga sum hmuh hmangin ‘Establishing Mizo Cultural Heritage Centre for Protecting the historical and natural heritage of Mizo at Kawlri’ tih hming pu a Project thawh mek a ni a. Kawlri tlang hi Mizo Lal Bengkhuaia kut ata Sapho in Mary Winchester ‘Zoluti’ an laklet lehna hmun niin hriatrengna lung-phun pawh phun a lo ni tawh a. He hmun hi Mizo history a thil chhinchhiahtlak tak a nih avangin NEC hnuaiah Project siamin Heritage Centre sak hna hi thawh a ni a. He Centre sak hna hi kumin May ni 1 khan bultan a ni a. A hmunhma laih hna an thawk mek niin Heritage Centre sakna tur bungraw mamawh te lakkhawm mek a ni bawk.
Bawrhsap in helai hmun a tlawh ah hian PWD hotute, Heritage Society aiawhte leh Contractor te nen an hmalakna te an enfiah a, SDC Dr. Marilyn Lalruatkimi chuan a tawiawm a ni.
He Heritage Site hi State pawn atang leh Mizoram chhung hmun dang atanga khualzin te hip nan thil tangkai tak ni tura beisei a ni a. Serchhip khawpui leh a chhehvel a chengte tan pawh len khawthawna hmun remchang niin a hmunhma hi a theih chin chinah environment hum-halh zawnga hmalak a nih avangin a ngaw a la chhah tha a. Mizo history vawnhimna a nih bakah Serchhip District tan Tourism hmasawnna kawnga thil tangkai a nih theih beisei a ni.
Comments
Post a Comment