CPA India Region, Region Zone-III ten Aizawl-ah Lok Sabha Speaker hovin Conference an nei

Commonwealth Parliamentary Association (CPA), India Region, Region Zone-III chuan nimin khan Mizoram Legislative Assembly Session Hall-ah Annual Conference vawi 21-na hmangin Plenery Session an nei a. An Chairman, Lok Sabha Speaker ni bawk Om Birla leh Rajya Sabha Chairman Harivash Narayan Singh te chuan an telpui a ni.

Commonwealth Parliamentary Association (CPA), India Region, Region Zone-III Annual Conference-ah hian CPA India Regional Chairman, Lok Sabha Speaker ni bawk Om Birla chuan hmarchhak bial in hmasawnna rahbi thar a rap chho mek chu lawmawm a tih thu sawiin, “Nimin khan, Aizawl ka lo luh dawnin Rel kawng hna kal mek ka hmu a, min tihlim hle. State zawng zawngte hi Rel kawnga thlunzawm vek a tul em em a ni. India rama investment rawn ti duh hi an tam a, hmarchhak bial-ah hian Tourism-ah te, Agriculture-ah te, Art & Culture lamah te investment nasa zawk kalpui theih niin ka ngai a. Kan inkalpawhna kawngte hi han tha lehzual se, chung hmalakna te chu chak zawkin kan kalpui thei ngei ang,” a ti a. “Democarcy-ah chuan mipui thlantlin keini hi mipui aw kan ni a, an harsatna leh an beseite chu kan ngaihtuah zel tur a ni. House inrelbawlna pawh tha takin kan kalpui tur a ni a. Inhnialna leh sawihona hrisel neihna hmunah i chantir tlat ang u. Democracy tichaktu chu ngaihdan hrang hrang hi a ni a. Kan ngaidan inang lo te chu kan sawiho thin a, dan ha leh policy tha a lo chhuak thin,” a ti bawk.

He hunah hian Mizoram Chief Minister Lalduhoma pawhin he huna kalkhawm te chuan kan ram chu mipuite rorelna ram, mitin huapzo leh dan lalna ram a nihzia min hriat nawn tir tih sawiin, “Nghet taka tungding zel turin Legislative zahawmna i vawnghim ang u,” a ti a. “Ram Dan hi Dan siamtuten rilru thianghlim, langtlang leh mipuite thatna tura an siam a ni tih an hriat phawt chuan tha taka zawm turin mipuite hi an inpeih mai thin a ni,” a ti a. Commonwealth Parliamentary Association chuan an tawnhriat inhrilh kawngah te, an inzir zelna atan te leh ngaihdan an inhrilhtawnna kawngah te a tanpui nasa tih sawiin, “Vawiin-a kan Conference pawh hi kan rama Legislative ruhrel tichak zualtu leh inpawhna thuk zawk neih nan i hmang ang u,” tiin kalkhawm te a sawm a ni.

Rajya Sabha Deputy Chairman Harivash Narayan Singh pawhin 21st CPA Conference-a a tel theih avanga vannei a intih thu sawiin, Mizoram sawrkarin tha taka a lo dawnsawn avangin lawmthu a sawi bawk a. CPA chu kum 100 aia upa tawh Association tangkai, Dan siamtuten an tawn hriatte an inhrilhtawnna leh ram Bial (region) chhunga an mamawh intawm thil pawimawh an sawihona hmun a nih thu sawiin, CPA Region Zone-III huamchhung State te India ram tana a pawimawhna leh ram economy tana tha an thawh hlawkzia a tarlang a. Hma a sawn zel nana tihtur hmabak pawimawh awm te a sawi lang bawk.

Ni hnih awh tur Commonwealth Parliamentary Association (CPA), India Region, Region Zone-II Annual Conference-ah hian an Chairman leh Nagaland Legislative Assembly Speaker Sharingain Longkumer chuan inkhawmpui an neih chhan leh a thil tum (keynote address) a sawi a. Mizoram Assembly Speaker Lalbiakzama chuan Palai kalte lawmna thu a sawi bawk.

CPA India Region bik hian India rama Legislature 31 te a thlungkhawm a. Region Zone pali-ah thenin Conference hmang mek Region Zone-III hian Assam, Arunachal Pradesh, Manipur, Meghalaya, Mizoram, Nagaland, Sikkim, Tripura (8 Branches) te a huam a ni. Chawhnu lamah ‘India - ASEAN hmathlir sumdawnna leh thawhhona a hmarchhak ram te telh dan’ (Inclusion of the Northeast Region in the India - ASEAN vision for Trade & Cooperation) tih thupui hmangin sawihona hun an hmang a ni.