Ngengpui Sanctuary atanga Sai chhuak la buaipui zel

Lawngtlai District chhunga awm Ngengpui Sanctuary atanga Ngengpui khaw ram-a Sai chhuak chu Ngengpui Sanctuary chhungah a la lut lova, Sanctuary-a hnawh luh tumin beih mek a ni.

Helai hmuna Sai chhuak hi Ngengpui khaw ramah hian tun thla tir lam atang khan hmuh tan a ni a. Forest Department nen tangdunin mipuiin hnawh bo tumin bei mek mah se, Sai hi Sanctuary chhungah a la lut lo nia hriat a ni. Deputy Conservator of Forest (DCF), Chhimtuipui Wildlife Division hnena report lut tawhah chuan Sai hian chhungkaw 18 thlawhhma a tichhe tawh a, report dang pawh a la luh belh zel rin a ni a, Dy. Conservator Forest, Dr. R. Lalruatfela chuan Sai-in thlawhhma leh Thlam a tihchhiatsakte hi zangnadawmna an hmuh ngei theih nan hmalak a nih tur thu a sawi bawk a ni.

Forest Department-in an hriat dan chuan Ngengpui Sanctuary-ah hian Sai hi pathum awmin, tunah hian Sai pakhat chu Sanctuary pawn, Ngengpui khaw ramah a awm mek a. Sai chungchangah hian Deputy Conservator of Forest, Chhimtuipui Wildlife Division chuan mipui hriat tur thuchhuah siamin, Lawngtlai atanga South Bungtlang inkara khaw awm te, a bikin khualzin leh loneitute fimkhur tur leh chhawn chhaiha tina lo turin a hriattir a. Sai hi hmu emaw a awmna chin hria emaw chuan mahni khua theuha Wildlife Guard-te a rang lama hriattir zel turin a ngen a ni.

Sai hi The Wildlife Protection Act, 1972-in Schedule-I hnuaiah dahin, chhawnchhaih, tawktarh, tûra hrai, tihnat emaw tihhlum emaw a khap a. He Dan hi bawhchhiat a nih chuan Dan bawhchhetur chu pawisa Rs. 25,000/- aia tlem lo chawi tur leh lung In-ah a lo berah kum 3 atanga kum 7 thleng tang tura hrem theih a nih thu Deputy Conservator of Forest thuchhuah ah chuan tarlan tel a ni.