Ayushman Card/Golden Card 5,65,428 siam tawh

Mizoram-ah Ayushman Card/Golden Card 5,65,428 siam ni tawhin he Scheme hi mipuite'n a thlawna damdawi In-a inenkawl nan tum 1,12,000 an hmang tawh.

Nimin khan Ayushman Bharat Pradhan Mantri Jan Arogya Yojana (AB PM-JAY) hnuaia Mizoram-a hmalakna thlirletna hun chu Aizawl-a Dawrpui Multipurpose Hall-ah neih a ni a, he huna tarlan a nih danin AB PM-JAY hi September, 2018 atangin Mizoram-ah hman tan a ni a, chhungkaw khawsak harsa leh dinhmun hnuaihnung zawk thlanchhuah (Socio Economic Caste Census 2011 leh RSBY 2018) bakah Ration Card Eng (Yellow) leh Pawl (Blue) nei chhungkuate tana duan a ni a. He Scheme hmang thei chhungkaw member tinin Ayushman Card/Golden Card an neih a ngai a, tun thlengin Mizoram chhungah Ayushman Card/Golden Card 5,65,428 siam a ni tawh a. Nimin thlengin he Scheme hi mipuite'n a thlawna damdawi In-a inenkawl nan tum 1,12,000 an hmang tawh a; heng inenkawlna senso atan hian sawrkar chuan Rs. 1,23,45,86,300/- a hmang tawh a ni.

He hunah hian Mizoram chhunga AB PM-JAY hman kawnga Hospital leh mimal tithate chawimawina hun hman niin, Mizoram puma AB PM-JAY hnuaia District Hospital titha ber chu Civil Hospital Lunglei niin Lawmpuina thuziak leh pawisafai Rs. 1,00,000/- hlan an ni a. CHC/SDH Category-ah Vairengte CHC chu titha ber niin lawmpuina thuziak leh pawisafai Rs. 70,000/- hlan an ni a. PHC Category-ah Kawrtethawveng PHC chu titha ber niin lawmpuina thuziak leh pawisafai Rs. 50,000/- hlan an ni a; Heng bakah hian District tina Arogya Mitra thawk tha thlan chhuahte hnenah chawimawina thuziak leh pawisafai hlan an ni bawk.

Health & Family Welfare Department hnuaia Mizoram State Health Care Society, State Health Agency ni bawk huaihawta Review Meeting hi Health & Family Welfare Minister Lalrinpuii chuan khuallian nia hmanpuiin Sangchhin Chinzah IAS, Secretary, Health & Family Welfare Department chu khualzahawm a ni a. He hunah hian Dr. Biakthansangi, Chief Executive Officer, Mizoram State Health Care Society chuan AB PM-JAY zinkawng sawizauin, hlawhtlinna hrang hrang an neihte bakah harsatna hrang hrang an lo paltlang tawhte leh hmachhawp awmte a tarlang a. Health Care Scheme thar lo awm tur Mizoram Universal Health Care Scheme (MUHCS) kalphung tur inzirtirna neih a ni bawk.

He hunah hian District tina Senior Chief Medical Officer, Senior Medical Superintendent leh Medical Superintendent te'n an District chhung leh Hospital-a AB PM-JAY an kalpui dan an tarlang a, PHC, CHC leh Sub-District Hospital-a hemi kaihhnawih Medical Officer zawng zawng bakah Arogya Mitra leh Block Accounts Manager-te an tel a ni.