Chhungkaw 8507 ten Sawhthing Tâm tuarin Sawhthing quintal nuai 10 vel thar beisei a ni

Kumin June, July leh August thlaa Sawhthing Tâm chuan Mizoram-a kuthnathawk chhungkua 8,507 a nghawng nia chhinchhiah a ni a. Kumin hian Mizoram-ah Sawhthing chingtu chhungkaw 25,154 awmin Sawhthing quintal nuai 10 chuang a thar beisei a ni.

Horticulture Department-a thawktute sawi danin kumin hian Mizoram pumah Sawhthing chingtu chhungkaw 25,154 an awm a, heng zinga chhungkaw 8,507 chu natna hrikin a tibuai a, August 16-30, 2024 inkar chhung khan Sawhthing Tâm enkawl leh beihlet dan tur mipuite hnena zirtirna, ‘Operation Ginger 2024’ Fehchhuah Runpui neih a ni a. Hemi hun chhung hian Horticulture Department thawktute chuan kuthnathawktute hnenah him zawka Sawhthing chin dan, Rannung in Sawhthing a ei/bawm enkawl dan bakah inven dan te an zirtir a ni. 

Mipui hnena zirtirna an kalpui chu a hlawk hle nia sawiin Horticulture Department thawktute chuan, “Kan hlawhtlinna hi 60%-100% inkar niin kan ngai a. Sawhthing thenkhat chu an rawn chawrno leh hlup hlup tawh a, kan lawm hle a ni,” an ti a. Sawhthing chingtu zingah a tir atanga ‘Tâm’ venna kap nghalte chuan an tuar nep deuh niin an sawi bawk.

Sawhthing Tâm chhan ZALEN zawhna chhangin Horticulture Department-a thawkte chuan, “Thlai hrim hrim hi chin tam a nih chuan natna hrik a keng tel ve hrim hrim a. Mizoram-a Sawhthing Tâm pawh hi Fur hunlai hi an inthlahpun hun a ni a, kan thlai chinna hmun hi tlangram ni mah se ruahtui a tam vangin lei a hnawng a, an inthlah-pung chak a ni,” an ti a. Sawhthing him taka ching tur chuan a chi chiah uluk a ngai tih an sawi bawk. Mizoram kuthnathawktute hian Thingpui, Thingria leh Thinglaidum an ching deuh ber nia thudawn a ni bawk.

Mizoram sawrkarin thlai thlanbik chi li-te lei a tum vangin kuminah hian Sawhthing, Aieng, Hmarcha leh Hmunphiah ching an tam hle a. Hriat theih chinah Sawhthing ching hi chhungkaw 25,154 awmin quintal 10,84,975 tharchhuah beisei a ni a. Aieng hi chhungkaw 3,414 atangin quintal 77,492 thar beiseiin Hmarchate chingyu chhungkaw 8,517 atangin quintal 36,774 leh Hmunphiah chingtu chhungkaw 8,500 atangin quintal 1,20,000 tharchhuah beisei a ni.