CM-in MZP chu ram leh hnam rawngbawlna, zirlaite kawng dik zawhtir tura hmalakna hmun tih hre turin chah

Chief Minister Lalduhoma chuan nimin khan Mizo Zirlai Pawl (MZP) Assembly vawi 68-na chu Champhai Tlangsam-ah khuallian nia hmanpuiin, Mizo Zirlai Pawl chu ram leh hnam rawngbawlna hmun, zirlaite kawng dik zawhtir tura hmalakna hmun a ni tih hre reng turin kalkhawmte chu a chah.

Mizo Zirlai Pawl (MZP) Inkhawmpui lian, Assembly vawi 68-na hi Champhai Tlangsam-a ‘Thanghlianga Sailo Run’ ah neih niin nimin-a he hun hmanpuitu Chief Minister Lalduhoma chuan MZP din chhoh dan sawiin, a tir phat atangin zirna chawisan kawngah te, Zofate irawm chhuak thu leh hla humhim kawngah te, Mizo hnam zia humhalh leh chawilar kawngah te nasa takin hma an lak thu leh mipuite pawhin tha takin an thlawp thin thu a sawi a. “Rambuai hun thim karah pawh MZP hian tha nasa takin a thawh. Student Joint Action Committee ang hma lain, Remna a thlen theih nana thawhhlawk ber zinga mi an ni,” tiin MZP chu Vawiin thleng pawhin Zofate huikhawmtu, Zohnahthlak unaute thlavang hauhtu, chhiatna an tawh pawh a kantu leh tanpui hmasa thintu an nih thu a sawi a. Ram leh hnam hmangaihna thinlung tuh kawngah te, zirna chawisan kawngah te, hnam zia chawilarna lamah te, inpumkhatna lamah te, ram hmasawnna lamah te pawh hma a la zui zel tih sawiin, “Hetianga ram leh hnam tana tha an thawh chhunzawm zel chuan mipui ten MZP an zahna leh ngaihhlutna hi a pung zel ang,” a ti bawk a. Mizo Zirlai Pawl chu ram leh hnam rawngbawlna hmun, zirlaite kawng dik zawhtir tura hmalakna hmun a ni tih hre reng tura kalkhawmte chu chahin, “Tu te emaw inhampuarna hmun, mimal hamthatna dap nana an hman mai mai in phal tur a ni lo,” tiin a fuih bawk a ni.

Mizoram sawrkar chuan Zofate huikhawma inpumkhatna leh tanrualna lama hmalak chu a thil tum pawimawh tak a nih angin Chief Minister Office-ah ‘Mizo Diaspora Cell’ din a nih thu Chief Minister chuan a sawi a. “Khawvel hmaa Zofate sang taka chawikan hi kan duh a, kan theih ang angin hma kan la tan a. Khawvel ram hrang hranga cheng mek Zofa ten rawn be pawp ula, a tul ang zelin kan ram tan i thawk tlang ang u,” a ti a. “Mizoram chu Zofate himna kulh, thlamuang taka Zofate chen za theihna anih angin ngaihlu tlang ila, a thatna turin mahni phak tawk theuh i thawk ang u,” tiin, Chi peng inhungbikna khauh lutuka kalpui chu min thendarh a min teitetu a ni tih a sawi a, “Zo hnahthlak hnam hrang hrangte hian Mizo Hnam chhungah kan chi peng hi lungawi takin kalpui zawk ila. Mizo anga kan dinchhuahna turah chuan thu khat i vua ang u,” a ti bawk.

Chief Minister chuan zirna chu mimal, chhungkua leh hnam ang pawha inphunngheh theihna hmanraw pawimawh a nih angin Mizoram sawrkar pawhin hemi kawngah hian nasa takin hma a la mek tih a sawi a. Zirna in hma a sawn theih nan Zirtirtu engemawzat lak an nih thu leh thingtlang lamah Zirtirtute Quarters tur pawh tam tham tak sak tum mek a nih thu a sawi a. Zirna mai ni lo, Skill Development, Entrepreneurship Development leh Sports lamah te pawh hma an la dawn tih sawiin, “Kan thalai, hlawhtlin tak tak tumte hi kan thlahthlam dawn lo. An banah kan kai ang a, kawng kan kawhhmuh ang a, kan khaichhuak dawn a ni. Chu chu kan Flagship Scheme - Hand-holding pawhin a tum ber pakhat a ni,” a ti bawk.

Nimin-a MZP Assembly vawi 68-na hi MZP Vice President C. Lalremruat chuan kaihruaiin General Secretary Chinkhanmanga Thomte hnen atangin Report ngaihthlak a nih bakah an President H. Lalthianghlima hnen atangin thusawi ngaihthlak a ni bawk.

MZP hian Chief Minister hnenah hian Chief Minister Relief Fund-ah Rs. 20,000 an chhunglut a. Chin Baptist Church, USA in Cham-phai District Sikul hrang hrang 15-a raltlante tanpuina tur Rs. 1,50,000 chu CM hian MZP Champhai te kutah a hlan bawk a ni.