Mizoram Rahbi 5.0 kalpui leh tura hawn a ni

Planning & Programme Implementation Department hnuaia Mizoram Startup Mission (MSUM) kaltlanga buatsaih tur, Mizoram Rahbi 5.0 chu nimin tlai khan Chief Secretary Dr. Renu Sharma chuan a hawng.

Mizoram Rahbi 5.0 hawnna hun Chief Secretary Pisa-a neih ah hian Mizoram Startup Mission (MSUM), Governing Board-a Chairperson ni bawk Dr. Renu Sharma chuan Mizoram Rahbi 5.0 kalpui tur chu Sawrkar hmalakna pawimawh tak, sundawnna kawnga chin dan thar leh dangdai deuh ngaihtuah chhuaka, eizawnna ngelnghet siam bakah State sum leh pai dinhmun siamthat kawnga hmalakna a nih thu a sawi a. Sumdawnna leh eizawnna kawnga bultan tum, hmabak eng takte chawikan nana ruahman a nih thu sawiin, “He intihsiaknaah hian Mizoram mi leh sa, tunhnaia sumdawnna kawnga hma la leh helama tuimite an tel thei dawn a, hemi kaltlanga titha thlanchhuahte chuan cheng nuai 7.5 thleng tanpuina an dawng thei dawn a ni,” a ti a. Mizoram Rahbi 5.0 chu Mizoram tana sundawnna kawnga hmalakna thar, viak tha leh hlawhtling a nih ngei theih nana ngaihlua a tam thei ang ber tel tum turin mipuite a sawm a ni.

Mizoram Rahbi 5.0 hian Mizoram chu a chhunga chengte leh chin dan thar, danglam bik hmangtea mahni kutke ngeia ding thei tura hlankai chu a tum bulpui ber a ni a. Hei hian intihsiakna mai ni lo, sumdawnna kawnga inhrilhhriatna, sumdawng dangte nena inthlunzawmna, a hralhna tur ngaihtuah bakah pawimawh dangte a huam tel a ni.

Ruahman dan chuan Mizoram Rahbi 5.0 a tel duh tan dilna hi Oct. ni 31, 2024 thleng hawn a ni dawn a, dilna thehlutte hi November ni 5-6, 2024 chhungin Business Plan siam dan zirtir an ni dawn a, November ni 7-ah sumdawnna sawifiah dan chungchang Workshop neih pui lehin November ni 18 ralhma ngeiin Contestant te'n anmahni puala Business Plan an buatsaih an thehlut ang. Hemi endikna atang hian November ni 22-ah Contestant intihsiaknaa tel zel theite chinfel a ni ang. Hemi atanga thlanchhuahte tan hian November 26-28, 2024 chhungin sumdawnna chungchang inhrilhhriatna leh sawifiah dante zirtirna neih leh a ni ang a, December ni 2-ah Final lutte puan an ni anga. December ni 5-6, 2024-ah Boot Camp neihpuiin December ni 11-ah sumdawnna chungchang sawifiahna leh inhrilhhriatna tawp ber neih a ni leh ang a, December ni 12-ah result puan a ni ang. Mizoram Rahbi 5.0 hnuaia hamthatna dawng tura thlan te'n December ni 16, 2024 ah Final Business Plan an thehlut ang.

Hrechiang duh tan Mizoram Startup Hub, Planning & Programme Implementation (P&PI) Deparment, Raj Bhavan Gate ep-ah zawhfiah theih a ni a. Dilna hi Office-ah leh MSUM website www.startupmizoram.com ah ngaihven theih a ni a, Office hun chhungin thehluh tur a ni ang.