Tun atanga kum 10-ah chuan Mizoram hmel hi a danglam tawh hle ang - PC. Vanlalruata

Agriculture Minister PC. Vanlalruata chuan, “Tun atanga kum 10-ah chuan Mizoram hmel hi a danglam tawh hle ang,” a ti.

ZPM Party chuan nimin khan Aizawl-a an Office-ah Chhung Inkhawm neiin he hunah hian Agriculture Minister PC. Vanlalruata chuan, “Mizoram damna turin damdawi kan zuar a, mipuiin kan damdawi zawrhte chu tha tiin Sawrkarna min pe a, tun atanga kum 10-ah chuan Mizoram hmel hi a danglam tawh hle ang,” tiin, “Bana Kaih Policy-ah hian thlai thar hralhna tur kan ngai pawimawh ber a, thlai thar Wholesale a zawrhna tur Building sak nan hmun hnih kan nei tawh a ni,” a ti bawk. Kuthnathawktu ten Link Road an mamawh thu an sawi thin thu sawiin Agriculture Minister chuan, “Tih hlawhtlin sak ngei pawh kan tum a, ZPM Sawrkarah hian kum 10 chhungin chhungkaw tam tak an ding chhuak ngeiin ka ring. Kum 10 hnuah chuan Mizoram hian hmel thar a hmuh ngei ka beisei a ni,” a ti.

Hand Holding Policy chu Mizoram tan damna tur anih ngei a beisei thu pawh sawiin PC. Vanlalruata chuan, “Kan Hand Holding Policy hi thla 9 chhungin kan tlangzarh hman a, Hand Holding Policy hian a tum ber chu hmasawnna tluantling leh nghet a ni a, kan ngaih pawimawh ber pakhat chu thlai thar hralhna Market a ni. Sawrkar kal tawhten helam hi an ngaihthah em em a, keini chuan kan auhla berah kan hmanga tihlawhtling turin a takin hma kan la mek a ni,” a ti a. “Kuthnathawktuten thil man (rate) hre sain thlai an ching tawh dawn a, kan inzawrh dan ang ngeiin tunah pawh kan kal tan mek a ni. Kan sawrkar tirh khan ka sawi tawh a, Aizawl khawpui chhung hmun 4-ah thlai thar hralhna tur Wholesale Market kan sa ang ka ti a, hei hi chak takin kan bawhzui nghal a, tunah hian hmun 2-ah Wholesale Market sakna tur sum cheng vbc. 10 kan dawng der tawh a ni. A hmunhma tur pawh Sihphir leh Melthum-ah te kan en tawh nghe nghe a ni,” a ti bawk.

Agriculture Minister PC. Vanlalruata chuan, “Bana Kaih Policy-ah kan hriat angin cheng nuai 50 thleng Bank Loan dahkham ngai lovin a lak theih dawn a, chu mai bakah Chief Minister Package cheng nuai khat a lak theih dawn bawk. Bana Kaih Policy-ah hian hlawhtling ngei turte chauh Sawrkarin a ngai pawimawh dawn a, a thlawna sem ang kha a ni ve lo tih kan hriat a tha. Kum khat pawh kan la Sawrkar hmain Opposition Party ten min beihna tur ringawt zawngin min bei nasa hle a, mahse keini chuan theihtawp chhuahin kan ram tan hna kan thawk zel dawn a ni,”a ti bawk.