Mizoram Sawrkar Flagship programme 'Bana Kaih (Handholding) Scheme' tlangzarh a ni
Mizoram Sawrkar Flagship programme 'Bana Kaih (Handholding) Scheme' tlangzarhna hun Aizawl Vanapa Hall-a neih ah hian Chief Minister Lalduhoma chuan, hun rei tawh tak atanga an suangtuah tawh thin 'Bana Kaih Scheme' tlangzarh a ni ta chu lawmawm a tih thu sawiin, Policy a hlawhtlin theih nana theihtawp chhuahtu leh thlawp tlat thintute inpekna ropui a tih thu a sawi a. Thlai thar 4 lei nan sum dah fel a nih thu leh Society kaltlanga lei tura ruahmanna duan a nih thu te sawiin, Society chu Politics tel lo, hruaitu tha leh mi thahnemngaite kaihhruai a ni tur a ni, a ti a. Rate tha zawk Rs 50/- chunglama Sawhthing hralh theite chu sawrkarin a buaipui dawn lova, Rs. 50/- tling lova an hralh erawh chuan a tlin lohna zat kha sawrkarin a hnawhkhah sak thung ang tih a sawi a. Thlai thar lei tura sawrkarin a lo puan tawh te bakah khan Kolasib leh Mamit District-ah kumin a Buhhum tharte Kg. ah Rs 30/- zela leisak tum a nih thu a tarlang bawk.
Chief Minister hian Bana Kaih Scheme chu Mizoram sawrkar flagship a nih avangin Implementing Department-ten an hna ngaihpawimawh hmasak ah an nei tlat tur a ni tih sawiin, MLA te pawh an Bial chhungah theuh tha taka kalpui a nih theih nan tan lo la turin a chah a. Bana Kaih Scheme chu thawkrim leh taimate tana siam a nih thu leh hmelhriat leh insawipui hmanga hmuh ve mai theih a ni dawn lo tih sawiin, Implementing Department hnuaia Search Committee te'n endikna an kalpui hnuah chauh Progress Partner-te thlan an ni anga. Progress Partner te tan sawrkar chu Quarantor-ah a tang anga, Loan rul thate chu an Loan Interest sawrkarin a pe let leh vek anga, rul tha lo te erawh chu Bank in dan a siam anga an chunga hmalak a nih bakah a tul angin Handholding portal-ah an hming tarchhuah a ni ang tih a sawi a. Handholding Loan Component atan hian SBI, MRB leh MCAB nena thawhhona ziah phawt tur a nih thu leh an kal dan tur tlangpui a sawi bawk.
He hunah hian Agriculture & Farmers Welfare Minister leh Mizoram Agricultural Marketing Board Chairman PC. Vanlalruata chuan, kuthnathawktute dinchhuah nana an au hla, Bana Kaih Scheme hawn fel a ni chu lawmawm a tih thu a sawi a. MSPCC Member Secretary Lalmalsawma Pachuau chuan Bana Kaih Scheme sawifiahin, Bana Kaih thil tum chu hmasawnna tlo leh tluantling hmanga Mizoram chu ram changkanga hlankai a ni a. Mi pakhatin kum khat chhunga chawhruala a lakluh zat (Capita Income) tihsan tum niin, tun dinhmunah Mizoram Per Capita Income chu Rs. 2,40,000 vel anga chhût a ni a, ram changkang te chu cheng nuai 80 vel bawr a ni thung a. Bana Kaih hi ZPM kaihhruai Mizoram sawrkarin puih tlak te khaichhuah theihna tura ruahmanna a siam a ni a, cheng nuai 50 thleng Loan dil theih a ni a; India khua leh tui dik tak - kum 18 chunglam, Mizoram-a cheng nghette tan dil theih a ni a, Mizoram sawrkar emaw, sawrkar laipui emaw hnuaia thawk tan erawh dil theih a ni lo thung.
Bana Kaih Scheme hmang hian hmasawnna tlo leh tluantling (Sustainable Development) hmanga Mizoram chu ram changkang (Developed State) a hlankai tum a ni a, Apex body chu Chief Minister kaih-hruaina hnuaia din Mizoram State Policy Coordination Committee (MSPCC) niin Nodal Department chu Planning & Programme Implementation Department a ni a. Bana Kaih (Handholding Scheme) hnuaiah hian Implementing Department 16 awmin, Component 5 a awm ang.
Comments
Post a Comment