Kawlphetha renchemna tur Project Minister in a hawng

Kawlphetha renchem leh awmze nei zawka hman tangkai a nih theih nana hmalakna ‘Demand Side Management Project’ chu nimin khan hawn a ni.

Aijal Club-a ‘Demand Side Management Project’ hawnna hun hi P&E Minister F. Roding-liana chuan khuallian nia hmanpuiin kum 10 chhunga power kan mamawh zat a let deuh thawa a pun thu a sawi a, kum 2015-a kan mamawh san lai berin 97 MW vel a nih laiin tunah chuan 163 MW chuang a lo nih tawh thu sawiin, hetihlai hian kan power siamchhuahte a pun si loh avangin ram pawn atangin man to tak takin kan chawkluh a ngai a, chuvangin renchem taka power kan hman a tul a ni, a ti a. “Unit khat kan vawnthat (save) hian Unit khat dang power tharchhuak tluk kan ni,” a ti a. Mizoram Sawrkar-in power-a intodelh turin nasa taka hma a lak mek thu pawh sawiin, Central lamah bawhzui ngaite bawhzui zel a ni a, reilote ah Project tha tak tak bul tan a nih thuai theih a beisei thu a sawi bawk.

Power Minister chuan kalkhawmte hma ah AT&C loss avanga Energy hloh tam lutuk tih tlem a tul zia sawiin, thawktute chu hemi kawngah tan la tura a fuih bakah, thahnem ngai taka mahni hna theuh thawk tur leh an hnate chu eizawnna mai anga ngai lova, rawngbawlna leh ram leh khawtlang tana thawk an ni tih inhre renga, tha thlah lova hna thawk thin turin a chah bawk a ni.

‘Demand Side Management Project’ hi Bureau of Energy Efficiency (BEE), Ministry of Power, Govt. of India kaltlanga Mizoram DISCOM - Power & Electricity Department leh Green Tree Global Pvt. Ltd. te hmalakna tur a ni a, kum 2 chhunga power mamawh 10% tala tihhniam tum a ni. Khawvel ram hrang hrangin an ngaih pawimawh em em Paris Agreement-a India a tel ve avangin energy renchem tura hmalakna hian ngaih pawimawh a hlawh em em a ni.