ASF vangin Vawk sing khat dawn chan a ni tawh

Serchhip District-ah kumin chhunga ASF vanga Vawk thi leh suat chu sing khat a tling dawn hnai ta.

Serchhip District-ah hian Inrinni khan ASF vanga Vawk thi hi 21 chhinchhiah belhin heng zinga 11 te chu Chhiahtlang khuaa mi te a ni a, East Lungdar leh Keitum-ah Vawk pathum ve ve thiin Baktawng-ah 2 leh Khawlailung leh New Ser-chhip North-ah Vawk pakhat ve ve an thi a. Nimin khan Keitum leh New Serchhip North-ah vawk thi pathum ve ve chhinchhiah niin Chhiah-tlang-ah Vawk thi pakhat chhinchhiah leh a ni bawk.

Inrinni vek khan Serchhip District-ah hri darh zel tur venna atan Vawk 24 suat ni bawkin heng zinga 12 te chu New Serchhip North-ah niin Khawlailung-ah Vawk 10 suat a ni bawk a, Sialsir leh East Lungdar-ah vawk pakhat ve ve suat a ni bawk a, nimin khan Chhiahtlang-ah Vawk 6 suat niin Serchhip P&E Veng-ah 3, New Ser-chhip South-ah 3 leh Baktawng-ah pakhat, a vaiin Vawk 12 suat leh a ni bawk.

Heti hian kumin chhungin Serchhip District-ah ASF avanga Vawk thi 3315 awmin Vawk 6671 suat a ni tawh bawk a, Serchhip District-a kumin chhunga Vawk thi leh suat hi a vaiin 9984 tling tawhin khaw 31-a chhungkaw 2084 in he hri avang hian harsatna an tawk tawh a ni. Serchhip District-a ASF hri leng hi a darh lutuk tawh rih lo niin a lang a, Vawk thi awmna khaw thenkhat ah erawh Vawk thi leh suat hi ala awm deuh reng thung a ni.

AH&Vety Department hnuaia Integrated Sample Survey Report, 2023-a a lan danin Mizoram in thla khat chhunga Vawksa ei ral chu kg. 4,07,145 nia chhut a ni a, Vawksa kg. khat Rs. 400 hisapin Rs. 16,28,58,000 man a tling a. Mizoram Pig Farmers’ Association hruaitute chuan tun dinhmunah Vawksa-ah Mizoram a la intodelh lo tih sawiin, a chhan ber chu Vawk hri len vang tih an sawi a, kum 10 kalta chhungin PRRS leh ASF vanga Vawk thi a tam thu an sawi bawk.