MSCW Chairperson banna pawm sak a ni

Mizoram State Commission for Women (MSCW) Chairperson C. Lalchhandami’n bânna a thehluh chu pawmsak a ni a, a ai lo awh lailawk turin Commission Member ni lai K. Lalremruati chu ruat a ni.

Social Welfare, Tribal Affairs, Women and Child Development Department thuchhuah tarlan danin MSCW Chairperson C. Lalchhandami banna thehluh an pawm bakah Governor remtihnain a aiawh turin Commission Member ni lai K. Lalremruati chu ruat a ni a, Chairperson tur ruat anih hma chu he dinhmun hi a chelh dawn a ni.

Tarlan tawh thin angin eptu party MNF leh zirlai pawlte’n bang tura an nawr Mizoram State Commission for Women (MSCW) Chairperson C. Lalchhandami chuan September ni 7 khan banna a thehlut a. A banna lehkhaah chuan MSCW-a Chairperson atana ruat a nih chungchang ah eptu political party-te atanga beihna nasa tak a tawh thu a tarlang a. He dinhmun hi kum 65 tlin thlenga chelh theih a nih avangin a kum dik tak ang chuan he dinhmun hi la chelh zui zel thei tur la niin a insawi a. Chutiang a nih rualin hetiang boruak karah chuan chak tak leh tha tak, phur taka hnathawh zui a harsa dawna a hriat thu a sawi a ni. 

C. Lalchhandami hian a awmna ZPM party hruaitute a biakrâwn hnuah hetianga party inchirhthehna tha lo tak awm zui tur hi tha a tih loh avang leh Women Commission zahawmna vawnhim na’n Chairperson a nihna atanga banna a thehluh tak thu a sawi a ni.