Thalai tha zawk, taima zawk leh tumruh zawk chherchhuak turin Chief Minister in Zirtirtute a chah

Serchhip Teachers' Association (STA) chuan nimin khan Serchhip Auditorium-ah General Assembly neiin an pawl kum 50 tlinna, Golden Jubilee lawmna kharna hun an hmang a, he hun hi Bialtu MLA leh Chief Minister Lalduhoma chuan hmanpuiin thalai tha zawk, taima zawk leh tumruh zawk chherchhuak turin Zirtirtute chu a chah a ni.

Serchhip-a Sawrkar School leh Private School hrang hranga thawk Zirtirtute telna Serchhip Teachers' Association (STA) in nimin-a he hun an hman ah hian Chief Minister Lalduhoma chuan Serchhip District chu India rama ziak leh chhiar thiam tam berna Dsitrict a nih thu sawiin, hei hi Zirtirtute thawhrimna rah a nih thu a sawi a. Hei bakah hian Serchhip District Bawrhsap hova Zirtirtu tha thlanga chawimawina hlan an ni chu lawmawm a tih thu sawiin, mi hlawhtling tama khua reng reng chu Zirtirtu tha awmna khua a nih thu a sawi bawk.

Chief Minister chuan Mizoram in UT sawrkar kan neih khan sawrkar hna a pun thu leh lehkhathiam kan la tam lutuk loh bawk avangin sawrkarah hna hmuh pawh a awl thu a sawi a. “Hun a lokal chho a, sawrkar hnaruak pung zel aiin lehkhathiam pung zel kha kan lo chak zawk thuai a, sawrkar hnaa luh a har ta tial tial a, tunah phei chuan a harsa tawh hle a ni,” a ti a. Mizoram sawrkarah hna ruak hi tlem mahse India sawrkarah erawh chuan luh theihna a la tam reng thung tih sawiin, “Kan thiamnain a tlin phawt chuan SSC te, Railway Recruitment Board te, IBPS lamah te hna a la tam hle. Rel kawng a rawn tlang tawh a, an service tan tep tawh a. Kan Rel Station enkawltu tur Mizo thalai Railway Officer leh staff tam tak kan mamawh dawn. MRB Manager tur Mizo thalai pawh hi kan mamawh tam hle. Mahse IBPS Exam paltlang thei kan nei mang tlat lo. Heng kan harsatna tawh mekte hi zirtirtuten chonaa ngaiin thalai tha zawk, taima zawk leh tumruh zawk min chherchhuahsak lo tum ang che u,” tiin “Heng Exam-a tling tawhte hian kan zirna system te, kan syllabus te an dem ngai lo. Tih tak takna nena beitu an tlem lutuk hi an mang tiangtu zawk a ni,” a ti bawk.

Chief Minister chuan STA hian Serchhip mipuite tan hna tha tak tak a thawk tawh thin tih sawiin, Zirtirtu hna chu hna zahawm, Pathian rawngbawlna hna leh midangte tanpuina hmun tha a nih thu a sawi a. “Kan ram hian hma lam kan pan zel theih nan thangthar tha zawk kan din a ngai a. Zirtirna tha pek an ngai tihna a ni. Chu chu rilru-a vawng chungin theihtawp i chhuah zel ang u,” tiin he huna kalkhawmte chu a sawm a ni.

Serchhip Teachers' Association (STA) General Assembly leh Golden Jubilee lawmna hun hi an President VL. Chanchinthahrilmawia chuan kaihruaiin Chief Minister hian Golden Jubilee Souvenir a tlangzarh nghal bawk a, MLA Trophy (Inter School Challenge) lawmman dawngtute hnenah lawmman a hlan bawk a ni.

Chawhnu lamah an pawl hruaitu tur thlangin an member Pension-a chhuak te an thlah bakah Report hrang hrang ngaihthlak a ni bawk.