CM-in Champhai Tlangsam-a Winery a tlawh

Chief Minister Lalduhoma chuan nimin khan Champhai Tlangsam hmuna Champhai Grape Growers Society te Winery tlawhin Society hotute a kawm nghal bawk.

Champhai Grape Growers Society hotute hian Chief Minister hnenah hian Grape Wine an tharchhuahte hlawk zawk leh zau zawka an hralhchhuah theih nan sawrkar hmalakpuina an lo ngen a. Grape Wine chu Food Item a nih anga zalen taka hralh theih an duh thu leh License-Vendor System pawh mumal zawka kalpui an duh thu an lo thlen bawk a ni.

Chief Minister Lalduhoma chuan Grape Growers Society te chu an Grape leh Wine dehchhuah hralhna kawngah sawrkarin thahnem a ngaihpui hle a ni tih hre tura chahin, an thilsiamte awmze nei leh hlawk zawka an hralh theih nan hma an lak dawn thu leh Grape chauh ni lovin thlai dang atanga siamchhuah thilte pawh an ngaihtuah tel dawn tih a hrilh a. Mizoram sawrkar chuan Flagship Programme - ‘Bana kaih - Hand Holding Policy’ hmangin kuthnathawktute khaichhuah a tum mek tih sawiin, he Policy hnuaia hamthatna te pawhin an mamawh dan a zirin an dil thei tih a hrilh bawk a ni.

Chief Minister hian nimin khan Champhai hi thlengin MZP Assembly a hmanpui hnuah Champhai Grape Growers Society te Winery hi a tlawh a, nizan khan Champhai-ah hian riakin Vawiin hian Serchhip a rawn pan leh dawn a ni.