VC by-election neih tur atan campaign hun a tawp ta

Serchhip District chhunga Village Council pahnih-a by-election neihna turah naktuk Sept. 24, 2024 khian mipui ten Vote an thlak dawn ta a, Campaign theih hun pawh nimin tlai khan a tawp tawh a ni.

Serchhip District chhunga VC pahnih, Serchhip Chhim Veng leh New Serchhip North VC-a General Seat ruak pakhat ve ve awm hnawhkhahna tura by-election neih turah hian naktuk, Sept. 24, 2024 zing dar 7:00 atanga tlai dar 5:00 chhung hian Vote nei ten Vote an thlak dawn a, he inthlanna neih tur atana Campaign theih hun pawh nimin tlai dar 5:00 khan a tawp tawh a ni. 

He inthlanna neih tur buaipuitu turte tana Training pawh neih ni tawhin a vawi hnihna atan Vawiin hian Training neih leh a ni anga, hetah hian inthlanna atana hmanraw pawimawh te pein an Duty-na tur an pan nghal dawn a. Naktuk zing dar 7:00 atanga tlai dar 5:00 thlengin Vote hi thlak theih a ni anga, Vote thlak zawhfel a nih veleh Vote tla te hi chhiar nghal tur a ni ang.

Tarlan tawh angin Serchhip Chhim Veng VC-ah hian VC Member atana thlantlin C. Laldinpuia chu a boral avangin General Seat ruak pakhat hnawhkhat turin by-election hi neih a ni dawn a, Candidate mi pathum awmin ZPM atangin Chawnghranghluna, MNF atangin Lalbiakdiki leh Independent Candidate PC. Siamliana te an ni a. He VC-ah hian tun dinhmunah MNF in Seat 2 neiin ZPM leh Congress in Seat pakhat ve ve an nei bawk a ni.

New Serchhip North VC-ah hian Member atana thlantlin B. Zaruala chu a boral avangin General Seat pakhat hnawhkhat turin by-election hi neih a ni dawn bawk a, Candidate pathum bawk awmin MNF atangin B. Lalpanliana, ZPM atangin H. Lalengzauva leh INC atangin H. Van-lalsawma te an ni a, VC Inthlanpui hnuhnung ber ah khan he VC-a Seat 5 awm chu MNF ten an la vek a ni.