Ramhlun Sports Complex-a Inhmun pe te tlawh

School Education Minister leh Aizawl North-II Bialtu MLA Dr. Vanlalthlana leh Land Revenue & Settlement Minister B. Lalchhanzova te chuan nimin zing khan Aizawl Ramhlun Sports Complex-a sawrkarin ram a lo theh tawh chu tlawhin khawtlang hruaitute an kawm.

Ramhlun Sports Complex Veng hian kum 2013 khan leimin nasa tak an tuar a. Anni bakah hian hemi kum veka Laipuitlang leh Ramhlun Venglai-a leimin vanga In leh lo chân an awm bawk a. Heng leimin avanga In leh lo chante tan hian sawrkar chuan Ramhlun Sports Complex Veng chuanhnuai ram chu ruahman sakin In hmun tur thehin a lo tehfelsak tawh a ni. 

Ramhlun Sports Complex Vengthlang-a inbengbel tam ber, In leh lo chantate hian an LSC hmasa chu sawrkar hnenah an lo hlan tawh a. In hmun tur theha tehfel ni tawh mah se Inhmun lehkha, House Site Pass emaw, LSC emaw an beisei anga an neih mai theih loh avangin bialtu MLA leh Revenue Minister-te hi hma lakpui turin an ngen a. Heng lai hmuna chengte’n LSC an neih vat theih nan a tul anga ramri te enfel a, ram neitu tur dik takin ram an neih theih nan leh a rang thei ang bera LSC pekchhuah a nih theih nan sawrkar chuan hmalak a tum thu an inkawmna ah hian sawilan a ni.