Vawiin-ah Vote thlak dawn
State Election Commission in ruahmanna a lo siam tawh angin Mizoram chhung District thenkhat a VC Seat ruak awm ah te Vawiin hian by-election neih a ni dawn a, hemi rual hian Serchhip District-a VC pahnih ah te pawh by-election hi neih a ni dawn a, nimin khan Inthlanna buaipuitu turte tana Training hnuhnung pawh neiin hemi rual hian inthlanna atana hman tur bungrua te pawh pekchhuah nghal an ni a, tukin dar 7:00 hian Vote nei te chuan Vote an thlak tan dawn a ni.
Tarlan tawh angin Seat 5 awmna Serchhip Chhim Veng VC-ah hian C. Laldinpuia a boral avangin General Seat pakhat a ruak a, he Seat chuh tur hian Candidate pathum awmin ZPM atangin Chawnghranghluna, MNF atangin Lalbiakdiki leh Independent Candidate PC. Siamliana te an ni a. He VC-ah hian Vote nei mipa 432 leh hmeichhia 443, an vaiin 875 an awm a, Serchhip Chhim Veng P/S chu Polling Station atana hman tur niin Vote thlak zawhfel a nih velah a hmunah hian Vote tla te hi chhiar nghal tur a ni ang.
New Serchhip North VC-ah hian VC atana thlantlin B. Zaruala chu a boral avangin General Seat pakhat a ruak bawk a, hei vang hian by-election hi neih tur niin Candidate mi 3 bawk an awm a, MNF atangin B. Lalpanliana, ZPM atangin H. Lalengzauva leh INC atangin H. Van-lalsawma te an ni a, he VC hian Kudam kawn atanga Kikawn thleng huamin Vote nei thei mipa 771, hmeichhia 826, an vaiin 1597 an awm a. Govt. New Serchhip M/S chu Polling Station atana hman tur niin Polling Booth pahnih siam a ni dawn a, Vote thlak zawhfel a nih veleh a hmun ngai ah hian Vote tla te pawh chhiar nghal tur a ni ang.
Heng VC pahnih-a Vote nei ten zalen taka Vote an thlak theih nan inthlanna neihna tur huam-chhunga Sawrkar Pisa, bank leh zirna in a thawktute tan Vawiin hi chawlh ah puan a ni bawk.
Comments
Post a Comment