Home Minister in MZP Assembly hmanpuiin Champhai District-a Head of Office te a kawm bawk

Home Minister K. Sapdanga chuan Mizo Zirlai Pawl (MZP) Assembly vawi 68-na chu nimin khan Champhai Tlangsam-a Thanghlianga Sailo Run-ah a hmanpui.

Home Minister chuan Mizo Zirlai Pawl (MZP) Assembly a hmanpui thei chu a lawm thu sawiin, Champhai MZP Sub-Hqrs. ah Vice President anih thin thu leh kum 1985-a MZP dinthar a nih khan, Zirlai Pawl thlazar hnuaiah Zoramin Remna a neih theih nan hruaitute hnung an lo zui ve thin tih a sawi a. MZP chu zirlaite chhertu, zirlaite hma ngaia an hmakhua sukawtu tur a nihna vawng reng turin a chah a ni. Home Minister hian Mizoram leh hnam humhalh a pawimawh thu sawiin, Mizoram run mektu ruihhlo laka fihlim turin zirlaite chu a chah a. Mizo mipa te suattu ruihhlo dona kawngah tanrual a tul takzet tih sawiin, Zirlaite chu ‘Kan lehkha zir hian hlawhtlinna a phur chhuak zo em?’ tih inzawt fo tur leh hnamdang te tihtheih chu theih ve tum turin a fuih a. Ram leh hnam humhalh nan zirna ngaih pawimawh leh ruihhlo do chu hna hmasa ah neih a ngaih thu a sawi bawk.

Home Minister K. Sapdanga chuan Mizoram sawrkarin flagship programme - ‘Ban a kaih’ hmangin thalai taima, mahni intodelh tum te tan kawng a hawng mek tih a sawi a. “Ti tak tak peih te dawm kan a, kawng hawn sak hi sawrkar tum ber a ni,” tiin Ram leh hnam humhalhna kawng pawimawh chu taimakna leh thawhrimna a ni tih hre reng turin zirlaite chu a chah bawk.

Nimin-a Mizo Zirlai Pawl Assembly vawi 68-na hun ngana hi MZP General Headquarters-a Teasurer Zairemthanga chuan kaihruaiin Adviser C. Lalrokhuma hnen atangin Assembly thupui - ‘Ram leh hnam tan - Mizo Zirlaite’ tih sawizauna ngaihthlak a ni bawk.

DP&AR changtu ni bawk K. Sapdanga hian nimin chawhnu khan Champhai DC Conference Hall-ah Champhai District-a Head of Office te kawmin Mizoram run mek tu ruihhlo dona kawngah theihtawp chhuah pui turin a ngen a, “Ruihhlo chu thil kalphung ve reng tur a ni ti a ngaih liam mai aiin, kan awmna theuh - Pisa, Kkohhran leh khawtlang atanga kan do tlan a ngai a ni,” a ti a. Dan lova kuhva lakluh do kawngah pawh sawrkarin theihtawp a chhuah zel dawn tih sawiin, Dan lova kuhva lakluhin a hrinchhuah thalaite rilru tlahniam te, lehkha zir tul tih lohna te, sum awlsam duhna te, In hmun lo ram man sang chak lutuk te bakah ramchhunga kuhva chingtu ten harsatna an tawh te titawp turin tan lak zel a ngai tih a sawi a. Sawrkar hna chu eizawnna atan chauh ni lo, vantlang rawngbawlna a ngai tura chahin, a hautak lo zawng, a thawkchhuak tam zawnga hna thawh tum theuh turin a ngen a, “Kan tu leh kan fate seilenna tlaka Mizoram chhuah theitu in ni tih hre ang che u,” a ti bawk.