TPDS chungchang zirho a ni

Targetted Public Distribution System (TPDS) hnuaia beneficiary-te chanvo leh an harsatna chhawk zangkhai dan, Grievance Redressal chungchang inhrilhhriatna chu nimin khan Aizawl-a Vanapa Hall-a neih a ni.

Nimin-a he hun hman hi Food, Civil Supplies & Consumer Affairs Department changtu Minister B. Lalchhanzova chuan hmanpuiin tute pawh hi mahni zawn theuhah vantlang tana tangkaina nei thei vek kan nih thu leh chanvo pawimawh tak kan neih thu a sawi a. A bik takin Retailer-te chu sawrkarin an tanghma a ngai em em tih hria a, mipuite tana thahnem ngai lehzual turin a fuih a. Sawrkarin TPDS chungchanga hma a laknate kalkhawmte hmaah hian sawi zauvin, Ration Card Var hmangte tana buhfai Kg-a Rs. 30 ni tawh tur chuan Mizona thinlung chawk thovin, rualkhai leh felfai zawka an kal phah ngei a rin thu a sawi a. TPDS beneficiary-te thliar fel dan tur chungchangah pawh sawrkarin ngaihtuahna nasa tak a sen mek thu a tarlang bawk a ni.

He hun hi FCS&CA Department changtu Secretary Zodingpuii chuan kaihruaiin 'Awareness Campaign on TPDS beneficiaries' hi TPDS hnuaia beneficiary-te chanvo leh an harsatna chhawk zangkhai dan kawnga inhrilhhriatna a nih angin, Retailer leh Local Council-te puala buatsaih a ni a. Hei bakah hian NGO hrang hrang leh Community-Based Organisations (CBOs) aiawh thahnem tak telin mithiam hrang hrang ten TPDS nihphung tlangpui te, One Nation One Ration Card (ONOCR) leh Grievance Redressal chungchang te sawiin,  Supply Minister baikah hian Zodingpuii IAS, Secretary, FCS&CA; Saizikpuii, Director, FCS&CA leh Victor Lalawmpuia, Dy. Director (G) & DCSO, Aizawl East te chu Panel Member an ni a. TPDS beneficiaries puala buatsaih Lehkhabu te chu tlangzarh nghal a ni bawk.