National Nutrition Month hman mek pualin Serchhip-ah ‘Fruit Festival cum Sale’ neih a ni
September thla tir atanga tun thla chhunga hman tur, Rashtriya Poshan Maah (National Nutrition Month) puala ‘Fruit Festival cum Sale’ hi Serchhip ICDS Project buatsaihin CDPO Conference Hall, P&E Veng-ah neih a ni a, he hun hi SWTA & WCD Joint Secretary Zonunthari chuan khuallian nia hmanpuiin naupangten chawtha kham khawp ei-a nun bul an tan theih nan zirtirna tha inpe a; Thisen tlakchham natna (Anemia) laka nu naupai, nau pawm leh tleirawl te venna tur leh eitur hrisel ei kawnga mitinin hma kan sawn zel theih na turin POSHAN Maah hi hman a ni, a ti. Nutrition tha avangin naupangin natna an do theihna a lo pung a, an thangduang a, lehkha zirna kawngah pawh hma an sawn chak, a ti. Naupang kum 6 hnuailamin In lama an ei bak Anganwadi-a ei tur tha an ei thin te chu an hriselna atan a tha em em tih sawiin, Central Sawrkar bultumin nutrition tha a thlawna kan dawng leh thei zel te chu kan vanneih thu a sawi a. Eitur tha hi thil manto tak a ni kher lo tih sawiin, Mizoten kan tharchhuah thlai hring te leh thei te, kan ban phak maia awm chuktuah huana kan tharchhuah te hi a hrisel em em a ni tih hria a, ei tur tha ei kawngah hmasawn tum theuh turin kalkhawm te a sawm a. Poshan Maah chu Department pakhat hmalakna avanga hlawhtling thei a ni lo tih pawh sawiin, Line Department hrang hrang te nena thawhhona leh mipui te tawiawmna avang chauha hlawhtling thei a nih thu a sawi a, thawhhona tha nei zel tura sawmin, Fruit Festival hlawhtling taka buatsaih a ni chu lawmawm a tih thu leh chin chhunzawm zel tlak nia a hriat thu a sawi bawk.
POSHAN (Prime Minister’s Overarching Scheme for Holistic Nutrition) Abhiyaan hi March ni 8, 2018 khan India Prime Minister in a hawng a, Mizoram-ah pawh hemi ni vek hian hman tan nghal niin he Mission hian a tum ber chu naupang zingah thanthu (stunting) te, taksa rihna leh san zawng nena khaikhina zang lutuk (underweight) te, nausen pianghlim buk zang lutuk te, chaw tha hmuh mumal loh avanga nu naupawm leh tleirawl ten thisen tlakchhamna (anemia) an vei thin te a lo rem theih nan Anganwadi Centre kaltlanga naupang enkawl leh zirtir te a tel a ni.
Eitur tha ei inzirtina, Poshan Maah (Nutrition Month) hi September ni 1 atang khan rampum-ah hman niin Serchhip District-ah pawh hman mek a ni a. Chawlhkar hmasa berah hian Infant and Young Child Feeding inzirtirna hun hmangin a kar hnihnaah Anemia Test neiin Health Department nena tanghoin naupang 700 bawr velz et enfiah an ni a; a kar thumna ah Indigenous Sports neiin Serchhip Field Veng Branch YMA Chhang te nen hun an hmang leh a; a kar tawp berah hian Fruit Festival hi buatsaih a ni leh ta a ni.
Nimin-a ‘Fruit Festival cum Sale’ hawnna hun hi Serchhip ICDS Project-a CDPO Caryll Lalpari chuan kaihruaiin Dr. Lalnunsangi Pachuau, Medical Officer (AYUSH), District Hospital Serchhip chuan Presentation neiin thei hrisel ei dan tur te leh mihring taksa hrisel nana hna a thawh dan te chipchiar takin a zirtir bawk a ni.
Ni khat awh Fruit Festival cum Sale-ah hian thei chi hrang hrang leh thei atanga siam chhuah Jam, Juice, Squash leh Chhang chi hrang hrang te lei theih tura phochhuah a ni a, Serchhip khawpui chhung bakah Zotui Orange Producer Company te, Lellen Amla Processing te, S& R Food te, Darei Banana Food Processing Industry te, Kimkim Food Processing Industry te an tel a. Serchhip mipui ten an hlutin an thil zawthchhuah chi hrang hrang pawh an hralh tha hle a ni.
Comments
Post a Comment