Spa therapy training tur mi 7 te thlahna hun hmang

Mizoram Youth Commission (MYC) kaltlanga Spa therapy training tur mi 7 (pasarih) te chu nimin khan Aizawl-ah thlahna hun hman a ni.

MYC Conference Room-a heng mi pasarih te thlahna hunah hian MYC Chairman Malsawmzuala Ralte chuan he training-a tel tur hian mi za chuang atangin heng mi pasarih te hi thlanchhuah an nih thu sawiin, “In hawiher, chetzia leh tawngkam atanga teh a training tura thlan in ni. Naktuk maiah vai ram panin in kal tawh dawn a, a then chu la kal ngai lo te pawh in ni ang. In kal chhuah chhan hi hre reng a, hlawhtling taka training chhuak vek turin kan duh che u a ni,” a ti a. Tawrhchhelna, tumruhna leh tih hram hram a ngaih hun pawh a awm ngei ang tih sawiin, Zalenna hmang sual lo tur leh Kristian kan nihna vawng nung reng turin a chah bawk.

He hunah hian MYC leh Spa Therapy Trainees hote chuan intiam-kamna an ziak nghal bawk a, MYC leh Trainees te tih tur leh intiamkamna point hrang hrangte uluk taka chhiar a sawiho anih hnuah intiamkamna hi ziah a ni a. He Training-a tel tur mi pasarih te hian Vawiin, Sept. 25, 2024 hian Aizawl chhuahsanin Delhi an pan anga, chumi hnuah Goa panin thla 18 chhung training hi an nei dawn a ni.