Doctor pahnih kutthlak thu ah Doctor te an lungawi lo

 Indian Medical Association (IMA), Mizoram State Branch chuan Inrinni zana an Doctor pui Synod Hospital Durtlang-a thawk mek, Dr. Laldinliana Sailo leh Dr. Rinngheta Renthlei ten sawisak rawn an tawk chu an lungawiloh thu sawiin, a titute na taka hrem an phut.

Thuchuah siama an tarlan danin Sept. ni 21 zan-ah Synod Hospital Durtlang a thawk mek Dr. Laldinliana Sailo leh Dr. Rinngheta Renthlei ten khawih rawn tawkin damdawi In-a dahluh hial ngaia sawisak an tawk chu an lungawi lo hle tih an sawi a, Magisterial Enquiry din turin Sawrkar an phut thu leh an beisei anga hmalakna a awm lo anih chuan IMA in a tul angin hma a lak dawn thu sawiin, Sawrkar chu a rang thei ang bera hma la ngei turin an phut tih an sawi bawk.

Police thuchhuah tarlan danin an hliam tawh dan chu Synod Hospital, Durtlang-ah uluk taka endik niin Dr. Laldinliana Sailo leh Dr. Rinngheta Renthlei-te chuan hliam na tak an tuar a, Lalthlamuana erawhin vanneihthlak takin hliam na tak a tuar lo thung a. Investigating Officer hmalakna chak tak avangin he thubuaia thil tisualtu a puh mi paruk Lalmalsawma Zote (25) Ramhlun North; Mark Zairemmawia (24) Ram-hlun North; Lalvenpuia (22) Ramhlun North; Sailianpuia Sailo (28) Venghlui; Vanlalpekhlua (23) Ramhlun North leh K.Vanlaltharzela (23) Ramhlun North te chu September 23 khan man nghal an ni a, an lakah thubuai ziahluh nghal a ni a. An thil tihsual hi in-bail theih a nih angin an vai hian bail in chhuah lailawk an ni leh tawh a ni. 

Police thuchhuah tarlan danin thil tisualtu a puh zinga pakhat Sailianpuia Sailo hi Police tanglai, tuna Aizawl DEF hnuaia Sairang Police Stationa thawk mek a ni a, a chungchangah Disciplinary Proceeding kalpui nghal a ni a, Superintendent of Police, Aizawl District thupek angin a hna atanga chawlh lailawk tir nghal a ni bawk.