Mizoram mamawh chawkluh theihna turin ruahmanna siam

Kawnpui leh Sairang inkar kawng chhiate thawmthat hna thawh mek a nih avangin mipuite nitin mamawh bungrua phurhluhna atan Kawnpui atanga Durtlang panna kawng siam hna thawh mek a ni a, helai kawngah hian nitin mamawh phur lirthei ke ruk nei chin chu zan lamah kaltir tura rel a ni.

Kawnpui leh Durtlang inkar kawng hi Kawnpui Sairang peng pelh deuh chiahah Lungrem a chim avangin kawngpui hi a min hek a, nimin atang khan nitin mamawh phur lirthei lian ke 6 nei chin tal an tlan theihna turin kawng chhak ko chu laih zauh a ni a, he hna thawh mek hi nimin khan Supply Minister B. Lalchhanzova chuan a hmunah a tlawh a ni.

Nitin mamawh Tuialhthei phur, Eirawng-bawlna Gas phur leh Buhfai phur lirthei te hi zan dar 6:00-ah Kawnpui atanga chhuakin, zanlai dar 12 pelh hma-in Aizawl an thleng hman tura tih a ni a; Aizawl atang hian zanlai dar 12:00 atangin Kawnpui lam pan kal tir leh an ni anga, zing dar 6:00 hmain Kawnpui Sairang peng an thleng hman dawn bawk a ni.

Kawnpui leh Khamrang inkar National Highway No 6 chak zawka siam hna thawh a nih theih nan hian Aizawl Traffic SP leh Kolasib SP te chuan nimin zing dar 8:00 atang khan lirthei eng chi mah kal an phal lova, hemi bawhzui hian Durlui leh Rengtekawn-ah lirthei dan a nih bakah Kawnpui Sairang peng bulah te dan a ni a, lirthei kal phal loh hi tunkar Inrinni zing thlenga kalpui tura ruahman a ni.

Hetihlai hian Postal Services Director, Mizoram Division, Aizawl chuan nimin khan thuchhuah siamin kawng tha lo avang leh tuialhthei lama harsatna an tawh avangin Mizoram chhung hmun hrang hranga 'dak' an pekchhuah thinah harsatna an tawk tih sawiin, anmahni dawrtute leh Zoram mipuite hriatthiamna an ngen tih a sawi bawk.