Lok Sabha Speaker in Aizawl-ah Press mite a kawm

Lok Sabha Speaker Om Birla chuan State hrang hrangin Assembly thutkhawm an neih chin tur bithliah zat dan anga awmsa chu an zawm tur a ni tih sawiin, Assembly neih zat tur a tlem ber anga duan zat tal zawm vek a pawimawh tih a sawi.

Nimin-a Assembly Annex Committee Room-a thuthar thehdarhtute a kawmna ah he thu hi sawiin Lok Sabha Speaker Om Birla chuan State Assembly thutkhawm zat tura duan Dan awmsa chu State tin ten an ngaih pawimawh a ngai tih a sawi a, State tina Legislators te pawhin tunlai thiamna hmang tangkaiin hmun dang te nen inpawh tlang taka awm theih nan hmang tangkai turin a duh tih a sawi a, State tin ten midangte thiltha tih leh kalphung tha an lo neih zir nan tunlai thiamna chu State tina Assembly Member ten hmang tangkai turin a duh tih a sawi a ni.

Lok Sabha Speaker chuan Commonwealth Parliamentary Association thutkhawmah langtlang zawka State tina Assembly te hmalakna mipui hnena a thlen theih dan tur chungchang sawi a ni dawn tih pawh sawiin, House tihdan phung leh kal hmang mipuite hriat tur chu mitinin an hriat theih nan hmalak a ni dawn tih a sawi bawk.

Om Birla chuan Mizoram-ah leh hmarchhak State hrang hrangah hmasawn theihna hrang hrang a awm thu pawh thuthar thehdarhtute hmaah sawiin, thlai chin leh kutkawih eizawnna bultan kawngah theihna hrang hrang a awm thu a sawi a, thutkhawm chhungin State tinin inpawh takin hmasawnna chungchang an sawi dawn thu a sawi bawk.