Mizoram-a NCC hmasawn theih dan tur sawiho

National Cadet Corps (NCC) State Advisory Committee chu Zirtawpni khan Sports & Youth Services Minister Lalnghinglova Hmar hova thukhawmin Mizoram-a NCC hmasawn theih dan tur hrang hrang an sawiho.

He thutkhawm SAD Conference Hall-II a neih ah hian Col. SS. Kalia, Commandant, 1 Mizo Bn. in Powerpoint Presentation hmangin NCC chanchin tlangpui leh Mizoram-a NCC Battalion te dinhmun, achievement leh hmathlir an neih te a tarlang a. Hemi hnu hian Aizawl-a NCC Group Headquarters din chungchang leh NCC hmasawnna tura hma lak dan turte sawiho chhunzawm a ni a. Zirna in leh zirlaite zingah zau zawka NCC chungchang zirtirna kalpui dan ngaihtuah nise tiin Zirna leh Sawrkar hna-ah NCC Officer leh Cadet te tana hamthatna (incentive) awm thei te sawiho a ni bawk a. Sports & Youth Services Department-a thawkte bakah Sawrkar Department dang – School Education Department, Higher & Technical Education Department leh Mizoram University te nen thawhho dan ngaihtuah nise an ti bawk.

NCC hi kum 1917 khan ‘University Corps’ ti a din tan niin, kum 1948-ah National Cadet Corps Act hnuaia National Cadet Corps (NCC) ti a thlak a ni a, tun dinhmunah khawvela ‘Uniformed Youth Organisa-tion’ lian ber a ni. Mizoram hi Silchar Group Hqrs. hnuaiah awmin Battalion pali - 1 Mizo Bn., 20 Mizo Bn., 1 Mizo Air Squadron leh 2 Bn. Mizo te a awm a ni.