Myanmar-a Zohnahthlak pawl pali ten inremna tluantling a awm theih nana hmalak zel tha an ti

Myanmar ramchhung Chin State-a Chin National Front (CNF), Interim Chin National Consultative Council (ICNCC), Chin Brotherhood leh Chinland Council te chuan Inrinni khan Aizawl-a inbiain inremna tluantling a awm theih nan a tul dan a zira inbiakna neih leh nise an ti.

Heng Zohnahthlak pawl pali te inbiakna hi Zo Re-Unification Organisation (ZORO) bultuma neih niin ZORO President R. Sangkawia chuan a kaihruai a, ZORO General Secretary L. Ramdinliana Renthlei chuan ZORO in remna palai hna an thawh chhan sawiin, “Zofate hi unau vek kan ni a, inhmu thiam lo tur kan ni lo a, tangrual tur zawk kan ni. Unau kan nih angin inthen thei kan ni lo a, indo thei pawh kan ni lo. Zofate chu khawi hmunah pawh awm ila lungrual taka awm tur kan ni a, keimahni leh keimahni hi hmelma ah kan insiam tur a ni lo a, hmelma thuhmun nei tlang zawk tur kan ni. Zofate hi Pathian ringtu kan ni a, Pathian in min pui anga engtik ni-ah emaw chuan inremin kan la awm anga kan la insuihkhawm vek dawn a ni,”a ti.

He hunah hian ZORO Vice President leh Adviser to CM Lalmuanpuia Punte chuan kan unau te inrem chu Mizoram sawrkar duhdan a ni tih sawiin, “Vawiina kan inkawmkhawmna pawh hi sawrkarin min hriatpui a ni. Sawrkarin ZORO kaltlangin remna palai hna kan thawk a ni. India Sawrkar pawh hian in inrem hi a duh a, India hian tanpuina min pek pawh a duh a ni,” tiin Remna Palai tura tha taka an kal chu lawmawm a tih thu a sawi bawk.

ZORO thuchhuah in a tarlan danin he inbiakna ah hian Burma ram Chin State-a kan unaute Chin National Front (CNF), Interim Chin National Consultative Council (ICNCC), Chin Brotherhood leh Chinland Council te telin, Chin State Burma chhunga cheng unau leh unau inkarah imhmuhthiam lohna awmin Silai hial lekin an lo inkap tawh a, nunna chan pawh an awm a. Hei hi ZORO chuan tha ti lovin inremna kawng a zawng ta a ni.

He inbiakna a tel pawl pali (4) te hian thuchhuah intawm siamin, “Keini Zofate (Chin-Kuki-Mizo) hi thlahtu thuhmun, tawng khat hmang (Same language - different dialect), nunphung thuhmun, serh leh sang inkhawih pawlh, beiseina thuhmun vuana dam leh tlang khatah, thih leh ruam khatah ti thin unau kan ni,” tiin Kan ram leh hnam tana hma an lakna kawngah an thahnemngaih luat avanga unau an inhmu thiam lo chu pawi an tih thu leh tun hnuah thleng tawh lo se an duh thu an tarlang a. “Tun hnuah buaina leh harsatna a lo awm pawhin tharum leh ralthuam che lek zawng a hmalak loh nise,” tiin ZORO hmalakna a inremna thuthlung sawiho chu tha an tiin an pawm thu leh inremna tluantling a awm theih nan a tul dan a zira inbiakna neih leh nise an ti a. “Inremna Committee siam tha kan ti a, Meeting leh hunah inremna Committee siam nise kan ti,” tiin an tarlang bawk a ni.