Hmun hrang hrangah VC by-election neih zawh a ni

Niminpiah a Mizoram District hrang hrang 8-a Village Council 14-a by-election neih chu tluang taka zawhfel a ni..

Mizoram District hrang hranga Village Council by-election neih ah hian Aizawl District-ah chuan Sihphir Venghlun Village Council-a Seat ruak pakhat hnawhkhat turin by-election neih a ni a, ZPM Candidate S. Lalnunpuia chuan vote 757 hmuin thlantlin a ni a, a khingpui MNF Candidate K. Lalthantluanga chuan vote 639 a hmu bawk a ni. Lunglei District-ah chuan Bunghmun West Village Council-ah General Seat ruak pakhat hnawhkhat turin by-election neih a ni a, Independent Candidate ZD. Lalbiaknunga chuan Vote 272 hmuin thlantlin a ni a, Candidate dang awmchhun H. Lalrawngbawla (ZPM) chuan Vote 229 a hmu a ni.

Champhai District-ah chuan Village Council pali-ah by-election hi neih niin Seat 5 awmna Ngur Village Council-ah Hrangsaipuia Sailo (MNF), Lalthansanga (MNF), Lalrammawia (ZPM), Langsuanpauva (ZPM) leh Reserved Seat-ah Dimlangi (MNF) te thlantlin an ni a, Seat ruak pakhat awmna Leisenzo Village Council-ah ZPM candidate K. Kapliana chu thlantlin niin Vote 199 a hmu a, he inthlan chuhtu dang Ningdotingi chuan Vote 153 a hmu a ni. New Champhai Village Council-ah INC Candidate Zothantluangi chu thlantlin niin Vote 315 a hmu a, Vanlalvuana Rokhum (ZPM) chuan Vote 252 a hmu a ni. Hmeichhe tana Seat hauh saka Seat ruak awmna Khuangthing VC-ah chuan ZPM Candidate Thahmingthangi chu chuhtu awm lovin tlingah puan a ni tawh bawk a ni.

Mamit District-ah Damparengpui-I Village Council-ah Seat ruak pakhat awmin MNF Candidate MS. Liana chu thlantlin a ni a. MS. Liana hian Vote 385 hmuin ZPM Candidate Oti Kumar chuan Vote 264 a hmuh bakah INC Candidate Lalengmawia chuan Vote 155 a hmu bawk. Kolasib District-a Kolasib Saidan VC-ah MNF Candidate C. Rothangi chuan Vote 207 hmuin thlantlin a ni a, he inthlan chuhtu dang Malsawmkima (ZPM) chuan Vote 201 a hmu a. Nisapui VC-ah chuan MNF Candidate Zodinpuia chu chuhtu awm lovin tling ah puan a ni bawk.

Khawzawl District-a Chawngtlai VC-ah Seat 5 awmin Candidate te chuhtu awm lova tling ah puan an ni a, heng te hi ZPM atangin Lalnunsanga, HC. Lalrinenga leh Reserved Seat-ah Biakremmawii bakah INC atangin Lalhmutluanga leh MNF atangin PC. Sangzawna te an ni a. Seat ruak pakhat awmna Khawzawl Dinthar VC-ah ZPM Candidate Lalhmingsanga chuan Vote 213 hmuin thlantlin a ni a, MNF Candidate R. Rohmingliana chuan Vote 212 hmuin INC Candidate K. Lawmthanga chuan Vote 128 a hmu bawk. Hnahthial South-II VC by-election neih ah ZPM Candidate V. Lalduhawma chuan Vote 294 hmuin thlantlin a ni bawk.