Scooter ruk pahnih lo man

Kar kalta tawp lama Aizawl atanga rukbo nia hriat Scooter (Scooty) pahnih chu nimin khan Serchhip-ah man niin a rutu nia hriat mi pahnih te pawh man nghal an ni bawk.
Thudawn danin nizan hmasa khan Serchhip B. Bukpui-a In ruak ah mi pahnih riakin heng mite hian Scooter (Suzuki Avenis) an khalh a, YMA Patrolling Duty te chuan ringhlelin thu an zawhfiah hnuah heng Scooter te hi an ruk a ni tih hriatchhuah a ni a, Serchhip Police te hnenah an hlan ta a ni.

Thudawn danin Suzuki Avenis var chu September 27 khan Aizawl Zemabawk atanga rukbo niin Suzuki Avenis dum pawh Saikhamakawn atanga rukbo a ni bawk a, heng Scooter bo te hi tuna an hmuh hi an ni ngei tih finfiah a ni a, Scooter var rutu hi Vanlalthakima (24), New Serchhip nia insawi niin a dum zawk rutu hi kum tlinglo, kum 2009 a piang niin a hming leh address tarlan a rem lo thung a. Melthum-ah inhlawhfa a awm nia insawiin, Serchhip Police ten thu an zawtfiah a ni. Heng Scooter neitute leh case ziahluhna Police te hian nimin khan heng Sccoter leh a rutu nia hriat te hi an rawn buaipui nghal a ni.