Chief Minister in Mizoram Civil Service Officer te tha tho taka Kalphung Thar tuipui turin a ngen

Chief Minister Lalduhoma chuan Mizoram Civil Service Officer te chu tha tho taka Kalphung Thar tuipui turin a ngen a. MCSA chuan The Mizoram Bana kaih (Handholding) Scheme chu tha an tih thu leh Champion pui ngei tura an awmna hmunah theuh theihtawp chhuah an tum thu Resolution siamin an pass bawk.

Mizoram Civil Service Association (MCSA) General Conference vawi 48-na nimin-a Aijal Club-a neih a hmanpuina ah Chief Minister Lalduhoma chuan he huna kalkhawmte chu Kalphung thar tha tho taka tuipui tura ngenin, “State dang umphak turin i tang ang u,” a ti a. “MCS Officer-te hi midangte kaihruaitu tur ber in ni a, entawn tlakin in awm tur a ni. Civil Service hna hi a zau a, tawnhriat leh thlir dan zau zawk in nei thei thin. He in vanneihna hi hmang tangkai zel ang che u,” a ti bawk. Chief Minister chuan Langtlang leh mitin huapzo rorelna chu Civil Service kalphung awmsa a nih thu sawiin, “Sawrkar thar hian a ngaipawimawh hle. Technology hmanga chung thilte chu nasa zawka kalpui theih a ni a. Kan uar deuh deuh dawn nia,” a ti a. MCS Officer te chu a hunlaia mithiam ber ber te an ni tih pawh sawiin, “Nangmahni a awm theihna hi rinhlelh tur a awm lo. Kan theihna leh thiamnate hi kan ram tan hlan ila, nasa takin mipuite rawng i bawl ang u,” a ti bawk.

Handholding Scheme chu ei leh bara hmasawnna mai ni lovin, mipui moral thlenga siam that tumna policy a nih thu pawh Chief Minister chuan sawiin, “Ngaihpawimawh hmasa ah in lo neih zel dawn nia. Sawrkar hnathawk pawl hrang hrang ten min hmuh tawh atanga ka hmuh danin, a hnuai lam Staff ten ngaihthah an hlawhin ka hria a, kan thawhna hmun theuhah kan hnuai leh kan chunga midangte nena thawhhona tha tak siam hi Officer tha awm dan tur a ni. Hemi chungchangah pawh hian MCS chu hmahruaitu in ni zel dawn nia,” tiin a chah bawk.

MCSA General Conference-ah hian an President V. Lalengmawia chuan Sawrkar hnathawk an nih chuan khawi hmunah pawh kal thei an ni tih an hriat a ngai tih sawiin, thuawih taka an kal thin thu leh harsatna te pawh awm ve thei a nih thu a sawi a. “Sawrkar tharin convergence a uar chho dawn a, hei hi tunhma atanga kan tih theih thinloh, kan nghahhlelh em em a ni. Kan awmna hmun theuhah Sawrkar Flagship Programme ‘The Mizoram Ban kaih (Handholding) Scheme’ tihlawhtlingtu ni turin theihtawp kan chhuah dawn nia,” tiin a chah bawk.

MCSA General Conference-ah hian Sawrkar flagship programme, The Mizoram Bana kaih (Handholding) Scheme, New Criminal Laws, Optimizing interpersonal conduct and Protocols in Administration, Ensuring Consistency: Best practises for Office Procedures te zirho a ni a. State sawrkar Flagship programme ‘The Mizoram Bana kaih (Handholding) Scheme’ chu tha an tih thu leh Champion pui ngei turin an awmna hmun theuh ah theihtawp an chhuah tur thu leh Mipuite hnena Essential Service tha zawk pek a nih zel theih nan District, Sub-Division leh Block-a hmasawnna ruhrel tun aia tih changkan a nih theih nan sawrkar-a thlen te an rel bawk.